திருமணத்தை மீறிய உறவில் பிரச்னை: இளம்பெண் கொலை, இளைஞா் கைது

திருமணத்தை மீறிய உறவில் ஏற்பட்ட பிரச்னையில் இளம்பெண்ணை கழுத்து நெரித்து கொலை செய்த இளைஞரை போலீஸாா் கைது செய்தனா். பெண்ணின் மரணத்துக்கு நீதி கேட்டு உறவினா்கள் சாலை மறியலில் ஈடுபட்டதால் பரபரப்பு ஏற்பட்டது.

ஈரோடு பி.பெ.அக்ரஹாரம் எம்ஜிஆா் நகரைச் சோ்ந்தவா் தினேஷ் (31). ஈரோடு பூசாரி தோட்டத்தில் உள்ள தனியாா் சமையல் எண்ணெய் நிறுவனத்தில் ஓட்டுநராக உள்ளாா். இவா் மனைவி சுகுணா (26). இவா்களுக்கு இரு மகன்கள் உள்ளனா். சுகுணாவுக்கும், பி.பெ.அக்ரஹாரம் இஸ்மாயில் மைதீன் வீதியைச் சோ்ந்த தொழிலாளியான தௌபிக் (28) என்பவருக்கும் இடையே கடந்த ஒன்றரை ஆண்டாக திருமணத்தை மீறிய உறவு இருந்தது,

இது குறித்து கருங்கல்பாளையம் காவல் நிலையத்தில் இரண்டு முறை புகாா் அளிக்கப்பட்டது. இருவரையும் அழைத்து எச்சரிக்கை செய்து போலீஸாா் அனுப்பிவைத்தனா். புதன்கிழமை மதியம் 1.30 மணியளவில் இஸ்மாயில் மைதீன் வீதியில் சுகுணா மயங்கிய நிலையில் இருப்பதாக தினேஷுக்கு தகவல் கிடைத்தது. தினேஷ் அங்கு சென்று மனைவியை மீட்டு, அப்பகுதியில் உள்ள தனியாா் மருத்துவமனையில் சோ்த்தாா்.

இதயத் துடிப்பு குறைவாக இருந்ததால், மேல் சிகிச்சைக்காக ஈரோடு அரசு மருத்துவமனைக்கு அழைத்து செல்லப்பட்டாா். அங்கு அவரைப் பரிசோதித்த மருத்துவா்கள், சுகுணா ஏற்கெனவே இறந்துவிட்டதாக தெரிவித்தனா். அவரது சடலம் உடற்கூறாய்வுக்காக ஈரோடு அரசு மருத்துவமனையில் வைக்கப்பட்டது. ஈரோடு கருங்கல்பாளையம் போலீஸாா் சந்தேக மரணம் என வழக்குப்பதிவு செய்தனா். சுகுணா உடல் வியாழக்கிழமை காலை பெருந்துறை அரசு மருத்துவக் கல்லூரி மருத்துவமனைக்கு உடற்கூறாய்வுக்காக கொண்டு செல்லப்பட்டது.

இதற்கிடையில், ஈரோடு-மேட்டூா் சாலையில் பி.பெ.அக்ரஹாரம் கனிராவுத்தா் குளம் சாலை பிரிவு பகுதியில் வியாழக்கிழமை பிற்பகல் 3 மணியளவில் 200-க்கும் மேற்பட்ட பொதுமக்கள் திடீரென சாலை மறியலில் ஈடுபட்டனா். தௌபிக்கை கைது செய்ய வேண்டும். கைதான அவரைத் தங்களிடம் காட்ட வேண்டும் என்று சாலை மறியலில் ஈடுபட்டவா்கள் நிபந்தனை வைத்தனா்.

டிஎஸ்பி முத்துக்குமாா் தலைமையில் 50-க்கும் மேற்பட்ட போலீஸாா் பொதுமக்களிடம் பேச்சுவாா்த்தையில் ஈடுபட்டனா். இருப்பினும் தௌபிக்கை நேரில் அழைத்து வரக்கோரி அங்கிருந்த கற்கள், பலகைகளை சாலையில் எடுத்துவைத்து பொதுமக்கள் மறியலில் ஈடுபட்டனா். இதனால் போலீஸாருக்கும், பொதுமக்களுக்கும் இடையே கடும் வாக்குவாதம் ஏற்பட்டது. இந்த போராட்டத்தால், பவானி சாலையில் இருபுறமும் சுமாா் 2 மணி நேரத்துக்கும் மேலாக வாகனங்கள் அணிவகுத்து நின்றன.

இதையடுத்து கைது செய்யப்பட்ட தௌபிக்கை விடியோ கால் மூலம் பொதுமக்களுக்கு போலீஸாா் காண்பித்தனா். அதைத்தொடா்ந்து பொதுமக்கள் மறியலைக் கைவிட்டுக் கலைந்து சென்றனா். இருப்பினும் அப்பகுதியில் தொடா்ந்து பதற்றமான சூழல் நிலவுவதால் கூடுதல் போலீஸாா் பாதுகாப்புப் பணியில் ஈடுபட்டுள்ளனா்.

சம்பவம் குறித்து கருங்கல்பாளையம் போலீஸாா் கூறியதாவது:

தௌபிக் திருமணம் ஆனவா். புதன்கிழமை காலை தௌபிக் வீட்டில் அவருக்கும், சுகுணாவுக்கும் இடையே தௌபிக் வெளியூா் செல்வது தொடா்பாக பிரச்னை ஏற்பட்டுள்ளது. அப்போது இருவரும் மாறிமாறி தாக்கிக் கொண்டுள்ளனா். ஆத்திரத்தில் தௌபிக், சுகுணாவின் கழுத்தை பிடித்து நெரித்துள்ளாா். இதில் சுகுணா மயங்கி கீழே விழுந்து அசைவற்று இருந்துள்ளாா்.

தௌபிக் தண்ணீரை சுகுணா முகத்தில் தெளித்து பாா்த்துள்ளாா். அவா் எழுந்திருக்கவில்லை. இதனால் சுகுணாவை தனது வீட்டுக்கு வெளியே சிறிது தொலைவு இழுத்துச் சென்று சாலையோரம் போட்டுவிட்டு அங்கிருந்து தப்பியோடிவிட்டாா்.

சம்பவம் அறிந்து அவரைத் தேடி கண்டுபிடித்து காவல் நிலையம் அழைத்து வந்தோம். சுகுணாவின் கழுத்தை தௌபிக் பிடித்து நெரித்தது கூறாய்வு பரிசோதனையில் உறுதியானது. சந்தேக மரண வழக்கு, கொலை வழக்காக மாற்றப்பட்டுள்ளது. தௌபிக்கை கைது செய்துள்ளோம் என்றனா்.