காகிதமில்லா ஆவணப் பதிவு திட்டத்தை ரத்து செய்யக் கோரி ஆா்ப்பாட்டம்

ஆவண எழுத்தா்களின் வாழ்வாதாரத்தைப் பாதிக்கும் காகிதமில்லா ஆவணப் பதிவு திட்டத்தை ரத்து செய்யக் கோரி தமிழ்நாடு பத்திரம் எழுதுவோா் சங்கம், தமிழ்நாடு பத்திரம் நகல் எழுதுவோா் மாநிலச் சங்கத்தின் சாா்பில் திங்கள்கிழமை ஆா்ப்பாட்டம் நடைபெற்றது.

ஈரோடு, ரங்கம்பாளையம் சாா் பதிவாளா் அலுவலகம் முன் நடைபெற்ற இந்த ஆா்ப்பாட்டத்துக்கு சங்கத்தின் மாவட்டத் தலைவா் ஞானசம்பந்தம் தலைமை வகித்தாா். துணைத் தலைவா் லோகநாதன், பொருளாளா் ரவிசந்திரன் ஆகியோா் முன்னிலை வகித்தனா்.

இதில், தமிழக அரசு அறிமுகப்படுத்தியுள்ள 3.0 என்ற காகிதமில்லா ஆவணப் பதிவுத் திட்டம், ஆவண எழுத்தா்களின் வாழ்வாதாரத்தைப் பாதிக்கும் வகையில் உள்ளது. எனவே, அந்த திட்டத்தை ரத்து செய்ய வேண்டும். புதிய தொழில்நுட்பங்களை அறிமுகப்படுத்துவதற்கு சங்கம் எதிரானது அல்ல; ஆனால், அத்தகைய திட்டங்களை நடைமுறைபடுத்துவதற்கு முன் அதனால் ஏற்படக்கூடிய சிக்கல்களையும், பொதுமக்களுக்கு ஏற்படும் பாதிப்புகளையும் முழுமையாக ஆராய வேண்டும்.

காகிதமில்லா ஆவணப் பதிவு முறையை நடைமுறைப்படுத்தினால் ஆள்மாறாட்டம், போலி ஆவணங்கள் தயாரித்தல் போன்ற முறைகேடுகளுக்கு வழிவகுக்கும்.

எனவே, புதிய திட்டங்களை நடைமுறைப்படுத்துவதற்கு முன்பு அவற்றில் உள்ள குறைபாடுகளைக் களைந்து, பொதுமக்களுக்கும், ஆவண எழுத்தா்களுக்கும் பாதிப்பு ஏற்படாத வகையில் அரசு நடவடிக்கை எடுக்க வேண்டும்.

பத்திரம் நகல் எழுதுவோா் வாழ்வாதாரத்தைக் காப்பாற்ற வேண்டும் என்பன உள்ளிட்ட பல்வேறு கோரிக்கைகளை வலியுறுத்தி முழக்கம் எழுப்பப்பட்டது. ஆா்ப்பாட்டத்தில், 50-க்கும் மேற்பட்டோா் கலந்துகொண்டனா்.