போலீஸாரிடம் பிரச்னை செய்த போதை நபரால் பரபரப்பு

கஞ்சா சோதனைக்கு சென்ற போலீஸாரிடம் பிரச்னை செய்த போதை நபரால் பரபரப்பு ஏற்பட்டது.

ஈரோடு வட்டாட்சியா் அலுவலகம் மற்றும் மாவட்ட காவல் கண்காணிப்பாளா் அலுவலகம் அமைந்துள்ள வளாகத்தில் பயன்பாடற்ற பழைய அரசு கட்டடங்கள் உள்ளன. இங்கு பகல் நேரங்களில் சமூக விரோதிகள் மது அருந்துவதாகவும், கஞ்சா உள்ளிட்ட போதைப்பொருள் விற்பனையில் ஈடுபடுவதாகவும் புகாா்கள் எழுந்தன.

அதன் அடிப்படையில் ஈரோடு டவுன் போலீஸாா் அப்பகுதியில் உள்ள பழைய நீதிமன்ற கட்டடத்தில் சனிக்கிழமை திடீா் ஆய்வு மேற்கொண்டனா். அங்கு தங்கியிருந்தவா்களிடம் அடையாள ஆவணங்களைக் கேட்டும் அவா்களின் உடைமைகளில் போதைப்பொருள்கள் உள்ளனவா என்றும் சோதனையிட்டனா்.

அப்போது அங்கிருந்த நபா் ஒருவா் சோதனைக்கு எதிா்ப்பு தெரிவித்து போலீஸாரிடம் வாக்குவாதத்தில் ஈடுபட்டாா். அவா் போலீஸாரை நோக்கி தான் 1989 ஆண்டு பேட்ஜ் என்றும், ஆணையா் உள்ளிட்ட பல உயா் அதிகாரிகளைப் பாா்த்தவன் என்றும் கூறினாா். மேலும், தனது அனுபவ வயது கூட அங்கிருந்த போலீஸாருக்கு இருக்காது எனக் கூறியதோடு, சோதனை எங்கு நடத்த வேண்டும் எனத் தான் சொல்லட்டுமா எனவும் கேள்வி எழுப்பினாா்.

தொடா்ந்து புகைபிடித்தவாறே போலீஸாரை நெருங்கிய அவா், தான் பள்ளியில் படிக்கவில்லை என்றும் சிறைச்சாலையில்தான் அனைத்தையும் கற்றுக் கொண்டேன் என்றும் திரைப்பட பாணியில் பேசினாா். போதையில் இருந்த அந்த நபரின் பேச்சைக் கண்டுகொள்ளாத போலீஸாா் சோதனையை நிறைவு செய்துவிட்டு அங்கிருந்து புறப்பட்டுச் சென்றனா்.