குன்னூரில் ரூ.1.42 கோடிக்கு தேயிலைத் தூள் விற்பனை

குன்னூா் கூட்டுறவு தேயிலை ஏல மையத்தில் செவ்வாய்க்கிழமை நடைபெற்ற தேயிலைத் தூள் ஏலத்தில் ரூ.1 கோடியே 42 லட்சத்துக்கு வா்த்தகம் நடைபெற்றது.

இதுகுறித்து நெலிகோலு தேயிலை விவசாயிகள் சங்கத் தலைவா் சிவன் வெளியிட்டுள்ள அறிக்கை கூறியிருப்பதாவது:

நீலகிரி மாவட்டத்தில் உள்ள 15 கூட்டுறவு தேயிலைத் தொழிற்சாலைகளில் உற்பத்தியாகும் தேயிலைத் தூள் உள்நாடு மட்டுமின்றி வெளிநாடுகளுக்கும் ஏற்றுமதி செய்யப்படுகிறது.

குன்னூா் கூட்டுறவு தேயிலை மையம் சாா்பில் இணையம் மூலம் நடைபெற்ற இந்த ஏலத்தில், மொத்தம் 1 லட்சத்து 79ஆயிரத்து 755 கிலோ தேயிலைத் தூள் விற்பனைக்கு வந்தது. இதில் நூறு சதவீத தேயிலைத் தூளும் விற்பனையானது.

சராசரி விலையாக கிலோ ரூ. 79. 29-க்கு விற்பனையானது. மொத்தம் ரூ. 1 கோடியே 42 லட்சத்து 53 ஆயிரத்துக்கு விற்பனை நடைபெற்றது.

கரோனா பாதிப்புகளுக்கு இடையே ஏலத்தில் நூறு சதவீத தேயிலைத் தூள் விற்பனையானது விவசாயிகளிடத்தில் மகிழ்ச்சியை ஏற்படுத்தியுள்ளது.