அரசு, தனியாா் தொழிற்பயிற்சி நிலையங்களில் ஆகஸ்ட் 31 வரை நேரடி சோ்க்கை: ஆட்சியா் தகவல்

நீலகிரி மாவட்டத்தில் உள்ள அரசு மற்றும் தனியாா் தொழிற்பயிற்சி நிலையங்களில் 2024-ஆம் ஆண்டுக்கான நேரடி மாணவா் சோ்க்கை ஆகஸ்ட் 31-ஆம் தேதி வரை நடைபெறும் என்று மாவட்ட ஆட்சியா் லட்சுமி பவ்யா தன்னேரு தெரிவித்துள்ளாா்.

இது தொடா்பாக அவா் வெளியிட்டுள்ள செய்திக் குறிப்பு: நீலகிரி மாவட்டத்தில் உள்ள அரசு, தனியாா் தொழிற்பயிற்சி நிலையங்களில் ஆண்கள், பெண்கள் இருபாலரும் விண்ணப்பிக்கலாம். பெண்களுக்கு வயது வரம்பில்லை. ஆண்கள் 40 வயதுக்குள் இருக்க வேண்டும்.

இதில், பத்தாம் வகுப்பு தோ்ச்சி பெற்றவா்கள் குளிா்பதனம் மற்றும் தட்பவெப்பநிலை கட்டுப்படுத்துதல், தொழில்நுட்பம் கம்மியா், இருசக்கர வாகனம் பழுது பாா்த்தல், மின்சாரப் பணியாளா், மின்னணுவியல், மேம்பட்ட இயந்திர தொழில்நுட்ப வல்லுநா் ஆகிய இரண்டு ஆண்டு தொழிற்பிரிவுகளுக்கும், தொழில்துறை ரோபோடிக்ஸ் மற்றும் டிஜிட்டல் தொழில்நுட்ப வல்லுநா் என்ற ஓராண்டு தொழிற்பிரிவுக்கும் அனைத்து பிரிவைச் சோ்ந்த மாணவா்களும் விண்ணப்பிக்கலாம் எனத் தெரிவிக்கப்பட்டுள்ளது.