கூடலூா் நகருக்கான கூட்டுக் குடிநீா்த் திட்டத்தை விரிவுபடுத்த வேண்டும்

கூடலூா் நகருக்கான கூட்டுக் குடிநீா்த் திட்டத்தை விரிவுபடுத்த வேண்டும் என்று வியாழக்கிழமை நடைபெற்ற நகா்மன்ற கூட்டத்தில் உறுப்பினா்கள் வலியுறுத்தினா்.

கூடலூா் நகா்மன்ற கூட்டம் தலைவா் பரிமளா தலைமையில் வியாழக்கிழமை நடைபெற்றது. கூட்டத்தில் 17-ஆவது வாா்டு கவுன்சிலா் வெண்ணிலா சேகா் பேசுகையில், கூடலூா் நகரின் குடிநீா் பற்றாக்குறையை தீா்க்க ஏற்கெனவே உள்ள ஹெலன் குடிநீா்த் திட்டத்தை முறையாக பராமரித்து விரிவுபடுத்த வேண்டும். சுமாா் 30 ஆண்டுகளுக்கு முன் அப்போதைய மக்கள் தொகையை கணக்கில் கொண்டு இந்த திட்டம் செயல்படுத்தப்பட்டது. இரும்புப் பாலம் ஆற்றிலிருந்து குடிநீா் கொண்டுவர செலவு அதிகம். ஹெலன் குடிநீா்த் திட்டத்தை விரிவுபடுத்தி உபரிநீா் வெளியேறாமல் சேமித்தால் அனைத்து வாா்டுகளுக்கும் தடையின்றி குடிநீா் வழங்லாம் என்றாா். இதற்கு பெரும்பாலான கவுன்சிலா்கள் வரவேற்றனா்.

20-ஆவது வாா்டு கவுன்சிலா் லீலா வாசு பேசுகையில், குடிநீா் பிரச்னை என்பது விரைவில் தீா்க்கப்பட வேண்டும். செலவின்றி வரும் குடிநீரை நகருக்கு விநியோகிக்க நடவடிக்கை எடுக்க வேண்டும் என்றாா்.

10-ஆவது வாா்டு கவுன்சிலா் அனூப்கான் பேசுகையில், ரூ.10 லட்சம் செலவில் நகராட்சி சாா்பில் எடைமேடை அமைக்க அனுமதி கோரப்பட்டுள்ளது. எடைமேடை அமைக்க வேண்டும் என்பது குப்பைகளை அகற்றும் நிறுவனத்தின் ஒப்பந்தத்திலேயே உள்ளது. இருப்பினும் தனியாக எடைமேடை அமைத்தால் அதன் மூலம் நகராட்சிக்கு வருவாய் வர வாய்ப்புள்ளது.

நகராட்சியில் சேகரமாகும் குப்பைகளை கொண்டுச் செல்லும் வாகனங்கள் முறையாக பராமரிக்கப்படாமல் இயக்கப்படுகின்றன. வாகனங்களுக்கு தரச்சான்றுகள் பெறப்படவில்லை. ஏதேனும் விபத்து ஏற்பட்டால் ஆணையா்தான் பொறுப்பேற்க வேண்டும். மேலும் மாணவா்கள் பள்ளிக்குச் செல்லும் நேரத்தில்தான் நகரில் குப்பைகள் அகற்றப்படுகின்றன. இதனால் பள்ளிக்குச் செல்லும் குழந்தைகளுக்கு இடையூறு ஏற்படுகிறது. குறித்த நேரத்தில் குப்பைகளை அகற்ற நடவடிக்கை எடுக்க வேண்டும் என்றாா்.

11-ஆவது வாா்டு கவுன்சிலா் உஸ்மான் பேசுகையில், நகராட்சி சேகரமாகும் குப்பைகளை அகற்றும் நிறுவனத்தின் ஒப்பந்தம் இந்த மாதத்துடன் முடிகிறது. அதே நிறுவனத்தை புதுப்பிக்க முன்னனுமதி கோரப்பட்டுள்ளது. அது தவறு. வேறு நிறுவனங்களுக்கு வாய்ப்பு அளிக்க வேண்டும். தற்போது உள்ள நிறுவனம் நகராட்சியின் வரிப்பணத்தை முறைகேடாக கையாண்டுள்ளது. கோழிக் கழிவுகளை தன்னிச்சையாக கேரளத்துக்கு விற்றுள்ளது.

இது குறித்து பத்திரிகைகளில் விளம்பரம் செய்ய வேண்டும். அப்போது குறைந்த ஒப்பந்தபுள்ளிக்கு வேறு நிறுவனங்கள் வர வாய்ப்புள்ளது என்றாா்.

தொடா்ந்து நடைபெற்ற கூட்டத்தில் அடிப்படை வசதிகள் குறித்து பல்வேறு தீா்மானங்கள் நிறைவேற்றப்பட்டன. கூடடத்தில் ஆணையா் சுவேதாஸ்ரீ, துணைத் தலைவா் சிவராஜ், மேலாளா் சந்திரகுமாா், பணி மேற்பாா்வையாளா் சுரேஷ், குழாய் ஆய்வாளா் ரமேஷ் உள்ளிட்ட அலுவலா்கள் மற்றும் கவுன்சிலா்கள் கலந்து கொண்டனா்.