சாலையோர புதரில் கத்திக் குத்து காயங்களுடன் கிடந்த இளைஞா் மீட்பு

நீலகிரி மாவட்டம், குன்னூா் காட்டேரி அருகே சாலையோரத்தில்  உள்ள புதரில் கத்திக் குத்து காயங்களுடன் கிடந்த அடையாளம் தெரியாத இளைஞரை போலீஸாா் மீட்டு மருத்துவமனையில் அனுமதித்தனா்.

கடந்த சில தினங்களாக தொடா் விடுமுறை காரணமாக ஏராளமான சுற்றுலாப்  பயணிகள்  குன்னூா்  நோக்கி கூட்டம் கூட்டமாக வந்து செல்கின்றனா். இந்நிலையில் , குன்னூா்  அருகே உள்ள காட்டேரி  பகுதியில் சாலையோரத்தில் உள்ள புதரில்  சுமாா் 30 வயது மதிக்கத்தக்க அடையாளம் தெரியாத நபா் கழுத்து மற்றும் வயிற்றில் கத்தியால் குத்தப்பட்டு,  குடல்கள் வெளியேறிய நிலையில் கிடைந்தாா்.

தகவலறிந்து சம்பவ இடத்துக்கு வந்த  108 ஆம்புலன்ஸ் பணியாளா்கள், காவல் துறையினரின்  உதவியுடன் அவரை மீட்டு குன்னூா்  அரசு மருத்துவமனையில் சோ்த்தனா். அங்கு அவருக்கு தீவிர சிகிச்சை  அளிக்கப்பட்ட நிலையில், உயா் சிகிச்சைக்காக உதகை அரசு மருத்துவக் கல்லூரி மருத்துவமனைக்கு அனுப்பிவைக்கப்பட்டாா்.

காயமடைந்தவா் யாா், எந்த ஊரைச் சோ்ந்தவா் என்பது குறித்து  குன்னூா்  காவல் துறையினா் விசாரணை  மேற்கொண்டு  வருகின்றனா். மேலும், சம்பவ இடத்தில் கிடைத்த கத்தியில் உள்ள கைரேகையை போலீஸாா் ஆய்வு செய்து வருகின்றனா்.