பாதாளச் சாக்கடைப் பணிகளை விரைந்து முடிக்க கோரிக்கை

உடுமலை நகராட்சிக்கு உள்பட்ட பகுதிகளில் நீண்ட நாள்களாக நடைபெற்று வரும் பாதாளச் சாக்கடைப் பணிகளை விரைந்து முடிக்க கோரிக்கை விடுக்கப்பட்டுள்ளது.

உடுமலை வட்டார உடல் உழைப்புத் தொழிலாளர் சங்க நிர்வாகிகள் கூட்டம், ஞாயிற்றுக்கிழமை நடைபெற்றது.

இக்கூட்டத்துக்கு சங்கத் தலைவர் எம்.குணசேகரன் தலைமை வகித்தார். பொதுச் செயலாளர் எம்.மூர்த்தி முன்னிலை வகித்தார்.

இதில், உடுமலை நகரில் நடைபெற்று வரும் பாதாளச் சாக்கடைப் பணிகளால் சாலைகள் மிக மோசமாக உள்ளது. இதனால் பொதுமக்கள் கடும் அவதிக்குள்ளாகி வருகின்றனர்.

இந்தப் பணிகளை விரைந்து முடிக்கக்கோரி செப்டம்பர் 25-ஆம் தேதி பிரசார இயக்கம் நடத்துவது, அமைப்பு சாரா கட்டுமானத் தொழிலாளர் வாரியத்தில் பதிவு செய்துள்ள தொழிலாளர்களுக்கு வழங்கப்படும் உதவித் தொகைகளை அதிகரிக்க வலியுறுத்தி அக்டோபர் 31-ஆம் தேதி மாநாடு நடத்துவது என்பன உள்ளிட்ட தீர்மானங்கள் நிறைவேற்றப்பட்டன.