அடிப்படை வசதிகள் கோரி ஆர்ப்பாட்டம்

உடுமலை ஒன்றியம், கொடுங்கியம் கிராமத்தில் அடிப்படை வசதிகள் செய்துத்தரக் கோரி மார்க்சிஸ்ட் கம்யூனிஸ்ட் கட்சி சார்பில் ஆர்ப்பாட்டம் செவ்வாய்க்கிழமை நடைபெற்றது.
உடுமலை ஊராட்சி ஒன்றிய அலுவலகம் முன்பு நடைபெற்ற இந்த ஆர்ப்பாட்டத்துக்கு, அக்கட்சியின் ஒன்றியச் செயலாளர் கி.கனகராஜ் தலைமை வகித்தார்.
ஆபத்தை ஏற்படுத்தும் விதமாக திறந்து கிடக்கும் ஊராட்சி பொதுக் கிணறுகளுக்கு கம்பி வலை அமைக்க வேண்டும். பாழடைந்து கிடக்கும் மகளிர் பொதுக் கழிப்பிடங்களை சீரமைத்து மக்கள் பயன்பாட்டுக்கு கொண்டு வர வேண்டும். 
கொடுங்கியம் ஊராட்சியில் சாலைகள் மற்றும் சுடுகாட்டை சீரமைத்துக் கொடுக்க வேண்டும். கொடுங்கியத்தில் பொது நூலகமும், கே.வல்லக்குண்டாபுரத்தில் பொதுக் கழிப்பிடமும் அமைக்க வேண்டும் என்பன உள்ளிட்ட கோரிக்கைகளை வலியுறுத்தி இந்த ஆர்ப்பாட்டம் நடைபெற்றது.