அடிப்படை வசதிகளை நிறைவேற்றக்கோரி ஆட்சியா் அலுவலகத்தில் பொதுமக்கள் மனு

திருப்பூா்: அடிப்படை வசதிகளை நிறைவேற்றக் கோரி பல்வேறு பகுதிகளைச் சோ்ந்த பொதுமக்கள் ஆட்சியா் அலுவலகத்தில் திங்கள்கிழமை மனு அளித்தனா்.

திருப்பூா் மாநகராட்சி 6 ஆவது வாா்டுக்கு உள்பட்ட எம்.ஜி.ஆா். காலனியில் சாக்கடை கால்வாயைத் தூா்வாருதல் உள்ளிட்ட அடிப்படை வசதிகளை நிறைவேற்றக்கோரி அப்பகுதி மக்கள் ஆட்சியா் அலுவலகத்தில் திங்கள்கிழமை மனு அளித்தனா்.

இது குறித்து எம்.ஜி.ஆா். காலனி பொதுமக்கள் அளித்துள்ள மனுவில் கூறியுள்ளதாவது:

திருப்பூா் மாநகராட்சி புதிய 6 ஆவது வாா்டு தொட்டிய மண்ணரை எம்.ஜி.ஆா். காலனி 1 ஆவது வீதியில் ஒரு புறம் மட்டுமே சாக்கடை கால்வாய் கட்டப்பட்டுள்ளது. மேலும், சாலையும் 2 அடி பள்ளத்தில் உள்ளதால் மழைக் காலங்களில் சாலையில் தேங்கும் நீருடன் சாக்கடை கழிவு நீரும் கலந்து வழிந்தோடுகிறது. இந்த சாலையைப் பயன்படுத்தும் வாகன ஓட்டிகள் மற்றும் பாதசாரிகளுக்கு நோய்த் தொற்று பரவும் அபாயம் ஏற்பட்டுள்ளது. ஆகவே, சாக்கடையை முறையாகத் தூா்வாரி சாலையை மேம்படுத்திக் கொடுக்க வேண்டும் என்று தெரிவிக்கப்பட்டுள்ளது.

சாக்கடை கால்வாய் அமைக்க கோரிக்கை:

நடராஜா லே அவுட் 4 ஆவது வீதி பொதுமக்கள் சாா்பில் அளித்துள்ள மனுவில் கூறியுள்ளதாவது:

திருப்பூா் 15 வேலம்பாளையம், நடராஜா லே அவுட் 4 ஆவது வீதியில் 100க்கும் மேற்பட்ட குடும்பத்தினா் வசித்துவருகிறோம். இந்தப் பகுதியில் சாக்கடை கால்வாய் வசதி செய்து தரக்கோரி மாநகராட்சி அதிகாரிகளிடம் பலமுறை மனு அளித்தும் எந்தவிதமான நடவடிக்கையும் எடுக்கவில்லை. அதேபோல, இந்தப் பகுதிகளில் பல ஆண்டுகளுக்கு முன்னா் போடப்பட்ட சாலை மிகவும் பழுதடைந்து குண்டும்குழியுமாக உள்ளது. ஆகவே, இந்தப் பகுதியில் சாக்கடை வசதி மற்றும் புதியதாா் சாலை அமைத்துக் கொடுக்க நடவடிக்கை எடுக்க வேண்டும் என்று தெரிவிக்கப்பட்டுள்ளது.

திருப்பூா் மாவட்ட ஆட்சியா் அலுவலகத்தில் தொலைபேசி வாயிலாக குறைகேட்புக் கூட்டம் நடைபெற்றது. இதற்கு மாவட்ட ஆட்சியா் க.விஜயகாா்த்திகேயன் தலைமை வகித்தாா். இதில், பொதுமக்களிடமிருந்து வீட்டுமனைபட்டா, முதியோா் உதவித் தொகை, புதிய குடும்ப அட்டை, சாலை வசதி, குடிநீா் வசதி உள்ளிட்ட பல்வேறு கோரிக்கைகள் தொடா்பாக 82 அழைப்புகள் பெறப்பட்டன.

இந்த அழைப்புகளின் மீது உரிய விசாரணை நடத்த சம்பந்தப்பட்ட துறை அலுவலா்களுக்கு ஆட்சியா் அறிவுறுத்தினாா்.

இந்தக் கூட்டத்தில், மாவட்ட வருவாய் அலுவலா் கு.சரவணமூா்த்தி, சமூக பாதுகாப்புத் திட்ட தனித்துணை ஆட்சியா் சாகுல்ஹமீது உள்ளிட்ட அரசுத் துறை அலுவலா்கள் பங்கேற்றனா்.