தாராபுரத்தில் தடுப்பூசி செலுத்திக் கொள்ள திரண்ட பொதுமக்கள்

தாராபுரத்தில் தடுப்பூசி செலுத்திக் கொள்ள திரண்ட பொதுமக்களால் கரோனா நோய்த் தொற்று பரவும் அபாயமும் ஏற்பட்டுள்ளது.

தாராபுரம் அலோசியஸ் பள்ளியில் கரோனா தடுப்பூசி செலுத்தப்படும் என்று கடந்த 2 நாள்களாக கட்செவி அஞ்சலில் தகவல்கள் பரவின. இந்த நிலையில், தாராபுரம் மற்றும் அதனைச் சுற்றியுள்ள பகுதிகளைச் சோ்ந்த ஆயிரத்துக்கும் மேற்பட்டோா் வெள்ளிக்கிழமை காலை 6 மணி முதலே பள்ளி முன்பாகத் திரண்டனா்.

இதன் பிறகு நீண்ட வரிசையில் காத்திருந்த பொதுமக்களுக்கு மருத்துவக் குழுவினா் வெள்ளிக்கிழமை காலை 9 மணி முதல் கரோனா தடுப்பூசி செலுத்தத் தொடங்கினா். இதனிடையே, தடுப்பூசி செலுத்த வந்த பொதுமக்கள் சமூக இடைவெளியைக் கடைப்பிடிக்காமல் இருந்ததால் கரோனா நோய்த் தொற்று பரவும் அபாயம் ஏற்பட்டுள்ளது.

மேலும், தடுப்பூசி செலுத்த வந்த பொதுமக்கள் சாலையின் இரு புறங்களிலும் வாகனங்களை நிறுத்தியதால் அப்பகுதியில் போக்குவரத்து நெரிசலும் ஏற்பட்டது.

இது குறித்த தகவலின்பேரில் சம்பவ இடத்துக்கு விரைந்த தாராபுரம் காவல் துறையினா் போக்குவரத்தை சீரமைத்தனா்.