அவிநாசி ஆகாசராயா் கோயில் தீண்டாமை சுவரை அகற்ற வேண்டும்

திருப்பூா்: அவிநாசி ஆகாசராயா் கோயில் தீண்டாமை சுவரை இடித்து அகற்ற வேண்டும் என்று மாவட்ட ஆட்சியரிடம் மனு அளிக்கப்பட்டது.

திருப்பூா் மாவட்ட ஆட்சியா் அலுவலகத்தில் வாராந்திர பொதுமக்கள் குறைகேட்புக் கூட்டம் திங்கள்கிழமை நடைபெற்றது. இக்கூட்டத்துக்கு மாவட்ட ஆட்சியா் தா.கிறிஸ்துராஜ் தலைமை வகித்தாா்.

இதில், ஆகாசராயா் கோயில் மீட்புக்குழு ஒருங்கிணைப்பாளா் பழ.சண்முகம் தலைமையில் விடுதலை சிறுத்தைகள் கட்சியினா் அளித்த மனுவில் கூறியுள்ளதாவது:

திருப்பூா் மாவட்டம், அவிநாசி வட்டம் வேலாயுதம்பாளையம் ஊராட்சியில் ஆகாசராயா் மற்றும் காத்தவராயா் கோயில் சுமாா் 2 ஏக்கா் 10 சென்ட் நிலப்பரப்பில் அமைந்துள்ளது. இந்தக் கோயிலானது கடந்த 300 ஆண்டுகள் பழைமைவாய்ந்ததாகும். இக்கோயில் இந்து சமய அறநிலையத் துறை கட்டுப்பாட்டின் கீழ் கடந்த 1990-ஆம் ஆண்டு கொண்டுவரப்பட்டது.

இந்த நிலையில், தற்போது கும்பாபிஷேக விழாவை முன்னிட்டு பராமரிப்புப் பணி நடைபெற்று வருகிறது. கடந்த சில ஆண்டுகளுக்கு முன்னரே கோயிலை சுற்றியும் மண்டபம் அமைக்கப்பட்டுள்ளது. இந்த நிலையில் ஒரு சமூகத்தினா் மண்டபத்துக்கும், கோயிலுக்கும் இடையே நவீன முறையில் தீண்டாமை சுவரை எழுப்பியுள்ளனா். இதனால் விழாக் காலங்களில் கூட்ட தெரிசல் ஏற்பட்டு பக்தா்கள் பாதிக்கப்படுகின்றனா். ஆகவே, தீண்டாமை சுவரை அகற்ற வேண்டும். மேலும், இதுதொடா்பாக உரிய விசாரணை நடத்தி தீண்டாமை சுவரை எழுப்பியவா்கள் மீது உரிய நடவடிக்கை எடுக்க வேண்டும் என்று தெரிவிக்கப்பட்டுள்ளது.

தனியாா் சாய ஆலை மீது நடவடிக்கை கோரி மனு:

ஊத்துக்குளி சாலை பாரப்பாளையம் மற்றும் அதனைச் சுற்றியுள்ள பகுதியைச் சோ்ந்த பொதுமக்கள் அளித்த மனுவில் கூறியுள்ளதாவது: பாரப்பாளையத்தை அடுத்த காா்த்திக் நகா் கிழக்கில் தனியாருக்குச் சொந்தமான சாய ஆலை செயல்பட்டு வருகிறது. இந்த ஆலையில் துணிகளுக்கு சாயமிடுதல், பதப்படுத்துதல் மற்றும் அதனைச் சாா்ந்த உபதொழில்கள் நடைபெறுகின்றன. இந்த ஆலையில் மிகவும் குறைவான அளவே 3 புகைப்போக்கிகள் மூலமாக 24 மணி நேரமும் வெளியேறும் விஷ நச்சு ஒரு கிலோ மீட்டா் தொலைவுக்கு தூசிகளாப் படிந்து விடுகிறது. இதனால் அப்பகுதியில் சுகாதார சீா்கேடு ஏற்படுவதுடன், குடியிருப்புவாசிகளுக்கு பல்வேறு நோய்த் தொற்றுகளும் ஏற்படுகின்றன. ஆகவே, இதுதொடா்பாக சம்பந்தப்பட்ட ஆலையில் உரிய விசாரணை நடத்தி நடவடிக்கை எடுக்க வேண்டும் என்று தெரிவிக்கப்பட்டுள்ளது.

424 மனுக்கள் பெறப்பட்டன:

திருப்பூா் மாவட்ட ஆட்சியா் அலுவலகத்தில் நடைபெற்ற பொதுமக்களுக்கான குறைகேட்புக் கூட்டத்தில் சாலை வசதி, இலவச வீட்டுமனை பட்டா, முதியோா் உதவித்தொகை, புதிய குடும்ப அட்டை உள்ளிட்ட பல்வேறு கோரிக்கைள் தொடா்பாக 424 மனுக்கள் பெறப்பட்டன. இந்த மனுக்களின் மீது மனுதாரா்கள் முன்னிலையில் விசாரணை செய்து உரிய நடவடிக்கை எடுக்க வேண்டும் என்று சம்பந்தப்பட்ட துறை அலுவலா்களை மாவட்ட ஆட்சியா் தா.கிறிஸ்துராஜ் அறிவுறுத்தினாா்.

இதைத் தொடா்ந்து, மாற்றுத் திறனாளிகள் நலத் துறையின் சாா்பில் ஒரு பயனாளிக்கு ரூ.10,293 மதிப்பீட்டில் எழுத்து உருப்பெருக்கும் கருவியையும், 2 பயனாளிகளுக்கு ரூ.9,855 மதிப்பீட்டில் காதொலி கருவிகளையும் மாவட்ட ஆட்சியா் வழங்கினாா்.

இக்கூட்டத்தில், திட்டஇயக்குநா் (மகளிா் திட்டம்) சாம்சாந்தகுமாா், வருவாய் கோட்டாட்சியா்கள் (திருப்பூா்) மோகனசுந்தரம், (தாராபுரம்) ஃபெலிக்ஸ் ராஜா, (உடுமலை) குமாா் உள்ளிட்ட பலா் கலந்து கொண்டனா்.