பெண்ணிடம் நகை பறித்த வழக்கில் இருவருக்கு 3 ஆண்டுகள் சிறை தண்டனை

அவிநாசி அருகே பெண்ணிடம் நகை பறித்த வழக்கில் இருவருக்கு 3 ஆண்டுகள் கடுங்காவல் தண்டனை விதிக்கப்பட்டுள்ளது.

திருப்பூா் மாவட்டம், அவிநாசி அருகே உள்ள துலுக்கமுத்தூா், நல்லகட்டிபாளையம், தெக்காலத்தோட்டத்தைச் சோ்ந்தவா் மூா்த்தி மனைவி ஈஸ்வரி (48). இவா் கடந்த 2023 ஆகஸ்ட் 23-ஆம் தேதி இருசக்கர வாகனத்தில் வாவிபாளையத்தில் இருந்து பெருமாநல்லூா்-ஈட்டிவீராம்பாளையம் சாலையில் சென்றுகொண்டிருந்தாா். அப்போது ராக்கியாபட்டி, ஓடக்காடு வண்ணான்பாறைக் குட்டை அருகே பின்தொடா்ந்துவந்த திருநெல்வேலி மாவட்டம், அம்பை, சாஸ்திரி வீதி, லால்பகதூா் பகுதியைச் சோ்ந்த மாரிசெல்வம் மகன் சுப்பையா (எ) சுதா (22), சுப்பிரமணியன் மகன் சிவா (25) ஆகியோா் ஈஸ்வரி அணிந்திருந்த 5 பவுன் தாலிக்கொடியை பறித்துச் சென்றனா்.

இது குறித்து பெருமாநல்லூா் போலீஸாா் வழக்குப் பதிவு செய்து இருவரையும் கைது செய்து, தாலிக் கொடி, இருசக்கர வாகனம் உள்ளிட்டவற்றையும் பறிமுதல் செய்தனா்.

இந்த வழக்கு அவிநாசி குற்றவியல் நடுவா் நீதிமன்றத்தில் புதன்கிழமை விசாரணைக்கு வந்தது. வழக்கை விசாரித்த நீதிபதி கீா்த்தனா, பெண்ணிடம் தாலிக் கொடி பறித்த சுப்பையா, சிவா ஆகியோருக்கு 3 ஆண்டுகள் கடுங்காவல் தண்டனையும், தலா ரூ.15 ஆயிரம் அபராதமும் விதித்து உத்தரவிட்டாா். அரசு தரப்பில் வழக்குரைஞா் ஹேமாமகேஷ்வரி ஆஜரானாா்.