டெங்கு காய்ச்சல்: பல்லடத்தில் சிறுவன் உயிரிழப்பு

பல்லடத்தில் டெங்கு காய்ச்சலால் பாதிக்கப்பட்ட சிறுவன் உயிரிழந்தாா்.

திருப்பூா் மாவட்டம், மேற்கு பல்லடத்தைச் சோ்ந்தவா் பிரவீன்குமாா். இவரது மனைவி ஹரிப்பிரியா. இவா்களது மகன் தமிழ் (4), வடுகபாளையத்தில் உள்ள தனியாா் பள்ளியில் படித்து வந்தாா்.

இவருக்கு கடந்த சில நாள்களாக தொடா் காய்ச்சல் இருந்துள்ளது. இதையடுத்து, தனியாா் மருத்துவமனையில் பரிசோதனை செய்தபோது, சிறுவன் டெங்கு காய்ச்சலால் பாதிக்கப்பட்டிருந்தது தெரியவந்தது.

இதையடுத்து, அவா் மேல் சிகிச்சைக்காக கோவை அரசு மருத்துவக் கல்லூரி மருத்துவமனைக்கு அனுப்பிவைக்கப்பட்டாா். அங்கு சிகிச்சையில் இருந்த சிறுவன் வெள்ளிக்கிழமை இரவு உயிரிழந்தாா். இது குறித்து பல்லடம் வட்டார மருத்துவ அலுவலா் சுடா்விழி கூறுகையில், சிறுவன் தமிழ் வைரஸ் காய்ச்சலால் பாதிக்கப்பட்டு பல்லடம் தனியாா் மருத்துவமனையில் சிகிச்சை பெற்று வந்தாா்.

பின்னா், மேல் சிகிச்சைக்காக கோவை அரசு மருத்துவமனையில் சோ்க்கப்பட்ட நிலையில், சிகிச்சை பலனின்றி உயிரிழந்தாா். அவரது இறப்புக்கான காரணம் மருத்துவப் பரிசோதனை அறிக்கை வந்த பின்னரே தெரியவரும் என்றாா்.