கலைஞா் கனவு இல்லத் திட்ட பயனாளிகளுக்கு நிதி ஒதுக்கீடு செய்யக் கோரிக்கை

அவிநாசி ஊராட்சிகளில் கலைஞா் கனவு இல்லத் திட்டப் பயனாளிகளுக்கு நிதி ஒதுக்கீடு செய்ய வேண்டும் என கோரிக்கை விடுக்கப்பட்டுள்ளது.

இது குறித்து மாா்க்சிஸ்ட் கம்யூனிஸ்ட் கட்சியின் மாவட்டக் குழு உறுப்பினா் பழனிசாமி மற்றும் பயனாளிகள் அவிநாசி ஊராட்சி ஒன்றிய வட்டார வளா்ச்சி அலுவலா் பாலசுந்தரத்திடம் செவ்வாய்க்கிழமை அளித்த மனு விவரம்: கலைஞா் கனவு இல்லத் திட்டத்தின்கீழ் பயனாளிகளுக்கு வீடு அமைப்பதற்கு அரசு சாா்பில் ரூ.3,50,000 மானியமாக வழங்கப்படுகிறது. இந்நிலையில், அவிநாசி ஒன்றியத்துக்குள்பட்ட செம்பியநல்லூா், புதுப்பாளையம் ஆகிய ஊராட்சிகளில் பயனாளிகள் வீடு அமைப்பதற்கான பணி ஆணை வழங்கப்பட்டு, அலுவலா்களும் கட்டுமானப் பணிகளை ஆய்வு செய்துள்ளனா். ஆனால், தற்போதுவரை நிதி ஒதுக்கப்படவில்லை.

இதனால், கட்டுமானப் பணிகளை பாதியிலேயே நிறுத்தும் நிலை ஏற்பட்டுள்ளது.

இது குறித்து முதல்வரின் தனிப் பிரிவு, மாவட்ட ஆட்சியா் உள்ளிட்டோரிடம் புகாா் தெரிவித்தும் எந்தவித நடவடிக்கையும் எடுக்கப்படவில்லை.

எனவே, சம்பந்தப்பட்ட பயனாளிகளுக்கு நிதி ஒதுக்க நடவடிக்கை எடுக்க வேண்டும் எனத் தெரிவிக்கப்பட்டுள்ளது.