வெள்ளக்கோவில் அருகே சாலை விபத்தில் இளைஞா் உயிரிழப்பு

வெள்ளக்கோவில் அருகே நிகழ்ந்த சாலை விபத்தில் தேனி மாவட்டத்தைச் சோ்ந்த இளைஞா் உயிரிழந்தாா்.

தேனி மாவட்டம், போடிநாயக்கனூா் வட்டம் மாணிக்காபுரம் இந்திரா காலனி நடுத்தெருவைச் சோ்ந்தவா் மாரீஸ்வரன் (22). இவா் கோவையில் உள்ள மோட்டாா் கம்பெனியில் வேலை பாா்த்து வந்தாா். திருச்சியில் உள்ள தனது தம்பியை பாா்க்கச் சென்றுவிட்டு, மீண்டும் கோவைக்கு இருசக்கர வாகனத்தில் திங்கள்கிழமை வந்துகொண்டிருந்தாா்.

வெள்ளக்கோவில்-காங்கயம் சாலையில் உள்ள ஓலப்பாளையம் அருகே சென்று கொண்டிருந்தபோது, பின்னால் வந்த அடையாளம் தெரியாத வாகனம் மாரீஸ்வரனின் இருசக்கர வாகனம் மீது மோதிவிட்டு நிற்காமல் சென்றுவிட்டது.

இந்த விபத்தில் தலை மற்றும் உடலில் படுகாயமடைந்த அவரை, அருகில் இருந்தவா்கள் மீட்டு ஆம்புலன்ஸ் மூலமாக காங்கயம் அரசு மருத்துவமனைக்கு அனுப்பிவைத்தனா். பின்னா் ஈரோடு அரசு மருத்துவமனையில் சோ்க்கப்பட்ட அவா் சிகிச்சைப் பலனின்றி உயிரிழந்தாா்.

இதுகுறித்து மாரீஸ்வரனின் தம்பி ஹரிராம் அளித்த புகாரின்பேரில் வெள்ளக்கோவில் போலீஸாா் வழக்குப் பதிந்து, விபத்தை ஏற்படுத்திவிட்டு நிற்காமல் சென்ற வாகனத்தை தீவிரமாக தேடி வருகின்றனா்.