வரைவு வாக்காளர் பட்டியல் இன்று வெளியீடு

 தருமபுரி மாவட்ட ஆட்சியரகத்தில் வரைவு வாக்காளர் பட்டியல் செவ்வாய்க்கிழமை (செப்.15) வெளியிடப்படுகிறது.

இதுகுறித்து மாவட்ட ஆட்சியர் கே.விவேகானந்தன் வெளியிட்ட செய்திக் குறிப்பு:

தருமபுரி மாவட்டத்தில் வாக்காளர் பட்டியல் சிறப்பு சுருக்கத் திருத்தப்பணி மேற்கொள்வதன் பொருட்டு வரைவு வாக்காளர் பட்டியல் மாவட்டத் தேர்தல் அலுவலரான ஆட்சியரால் வெளியிடப்படுகிறது.

அதனைத் தொடர்ந்து, வரும் அக்டோபர் 14-ஆம் தேதி வரை அனைத்து வேலை நாள்களிலும் காலை 10 மணி முதல் மாலை 5 மணி வரை வாக்காளர் பட்டியலில் பெயர் சேர்த்தல், நீக்கம், பிழைத் திருத்தம், முகவரி மாற்றத்துக்கான விண்ணப்பங்கள் வாக்குச்சாவடி மையங்களில் நிர்ணயிக்கப்பட்ட நிலை அலுவலர்களால் பெறப்படும்.

அடுத்தாண்டு ஜனவரி 1-ஆம் தேதியை தகுதி நாளாகக் கொண்டு 18 வயது நிறைவடைந்தவர்கள் அதாவது 1997-ஆம் ஆண்டு டிசம்பர் 31ஆம் தேதி அன்றோ, அதற்கு முன்னர் பிறந்தவர்கள் படிவம் 6-ஐ நிறைவு செய்து வயது, இருப்பிடத்துக்கான ஆதாரத்துடன் விண்ணப்பிக்கலாம்.

வரும் புதன் (செப்.16) மற்றும் செப்டம்பர் 30ஆம் தேதிகளில் வாக்காளர் பட்டியலில் பெயர் சேர்ப்பதற்கான சிறப்பு கிராமசபைக் கூட்டம் மாவட்டத்தில் உள்ள 251 ஊராட்சிகளிலும் நடைபெறும். இதில் சம்பந்தப்பட்ட ஊராட்சிகளின் வாக்காளர் பட்டியல் பொதுமக்கள் பார்வைக்கு வைக்கப்படும்.

இதுதவிர, செப்டம்பர் 20, அக்டோபர் 4- ஆகிய தேதிகளில் அரசு விடுமுறை நாள்களில் வாக்காளர் பட்டியலில் பெயர் சேர்ப்பதற்கான சிறப்பு முகாம் அனைத்து வாக்குச்சாவடி மையங்களில் காலை 9.30 மணி முதல் மாலை 5.30 மணி வரை நடைபெறும்.

அதேபோல, மாவட்டத்தில் அங்கீகரிக்கப்பட்ட 59 கணினி மையங்களில் ஆன்லைன் மூலம் விண்ணப்பிக்கலாம் என்று தெரிவிக்கப்பட்டுள்ளது.