கிராம சாலைகளை சீரமைக்க வலியுறுத்தல்

அரூர் ஊராட்சி ஒன்றியத்தில் பழுதான கிராம சாலைகளை சீரமைக்க வேண்டும் என தமிழ்நாடு தீண்டாமை ஒழிப்பு முன்னணி வலியுறுத்தியுள்ளது.
அரூரில் அந்த சங்கத்தின் 3-ஆவது வட்ட மாநாடு வட்டத் தலைவர் பி.வி.மாது தலைமையில் புதன்கிழமை நடைபெற்றது.
இதில் நிறைவேற்றப்பட்ட தீர்மானங்கள்: அரூர் ஊராட்சி ஒன்றியத்தில் எச்.தொட்டம்பட்டி, மோப்பிரிப்பட்டி, கம்மாளம்பட்டி, கோபிநாதம்பட்டி உள்ளிட்ட கிராம சாலைகள் குண்டும் குழியுமாக போக்குவரத்துக்கு பயனற்ற வகையில் உள்ளன. எனவே, பழுதான இந்த கிராம சாலைகளை சீரமைக்க வேண்டும்.
அரூர் பகுதியில் நிலவும் குடிநீர் தட்டுப்பாடுகளை நீக்க வேண்டும். டி.ஆண்டியூரில் இருளர், ஜடையம்பட்டியில் அருந்ததியர் சமூக மக்களுக்கு ஏற்பட்டுள்ள வழிப் பிரச்னையை தீர்க்க மாவட்ட நிர்வாகம் நடவடிக்கை எடுக்க வேண்டும். கிராமப் பகுதிகளில் பழுதாகியுள்ள தொகுப்பு வீடுகளை சீரமைக்க வேண்டும். பஞ்சமி நிலங்களை மீட்டு நிலமற்ற தாழ்த்தப்பட்ட மக்களுக்கு வழங்க வேண்டும் என்பன உள்ளிட்ட தீர்மானங்கள் நிறைவேற்றப்பட்டன.
தமிழ்நாடு தீண்டாமை ஒழிப்பு முன்னணியின் அரூர் வட்டத் தலைவராக கே.என்.ஏழுமலை, வட்டச் செயலராக பி.வி.மாது, பொருளாளராக பி.சங்கு ஆகியோர் தேர்வு செய்யப்பட்டுள்ளனர். இதில், மாவட்டத் தலைவர் டி.எஸ்.ராமச்சந்திரன், மாவட்டச் செயலர் டி.மாதையன், ஒன்றிய செயலர் ஆர்.மல்லிகா உள்ளிட்டோர் கலந்துகொண்டனர்.