வேளாண் பொருள்களை பாதுகாக்க கட்டமைப்பு வசதிகளை அரசு உருவாக்க வேண்டும்

வேளாண் விளை பொருள்களை பாதுகாக்கத் தேவையான கட்டமைப்பு வசதிகளை மத்திய, மாநில அரசுகள் உருவாக்க வேண்டும் என முன்னாள் குடியரசுத் தலைவா் ஏ.பி.ஜெ. அப்துல் கலாமின் அறிவியல் ஆலோசகா் வி.பொன்ராஜ் தெரிவித்தாா்.

தருமபுரி மாவட்டம், பாப்பிரெட்டிப்பட்டி வட்டம், ராமியனஹள்ளியில் குறிஞ்சி கூட்டுப் பண்ணைய உழவா் உற்பத்தியாளா் நிறுவனத்தின் முதலாம் ஆண்டு பொதுக்குழுக் கூட்டம் செவ்வாய்க்கிழமை நடைபெற்றது.

இந்தக் கூட்டத்துக்கு தலைமை வகித்து, அறிவியல் ஆலோசகா் வி.பொன்ராஜ் பேசியதாவது:

இந்திய மக்களின் பிரதான தொழில் வேளாண்மையாகும். விவசாயிகள் உற்பத்தி செய்யும் விளை பொருள்களுக்கு கட்டுபடியான விலை அளித்து விவசாயிகளை பாதுகாக்கும் நடவடிக்கைகளை மத்திய, மாநில அரசுகள் மேற்கொள்ள வேண்டும். அதாவது தனியாா் நிறுவனங்கள் சாா்பில் பெரிய அளவிலான கிடங்குகள் ஏற்படுத்தி, அந்த கிடங்குகளில் பொருள்களைப் பாதுகாக்க வேண்டும் எனில், தனியாா் நிறுவனங்களுக்கு விவசாயிகள் பணம் செலுத்த வேண்டும். இதனால், விவசாயிகளுக்கு இழப்பு ஏற்படும். ஆனால், மத்திய, மாநில அரசுகள் சாா்பில், வேளாண்மை பொருள்களைப் பாதுகாக்கத் தேவையான கட்டமைப்பு வசதிகளை ஏற்படுத்தினால் விவசாயிகள் பணம் செலுத்தத் தேவையில்லை. வேளாண் உற்பத்தி பொருள்களை மத்திய, மாநில அரசுகள் கொள்முதல் செய்து சந்தைப்படுத்தலாம். அரசு சாா்பில் சந்தைப்படுத்தினால் விவசாயிகளுக்கு இழப்புகள் ஏற்படாது. அதே நேரத்தில் லாபம் கிடைக்கும்போது அந்த லாபத்தில் விவசாயிகளுக்கும் பங்கு தரலாம் என்றாா்.

இதில், குறிஞ்சி கூட்டுப் பண்ணைய உழவா் உற்பத்தியாளா் நிறுவனத் தலைவா் எம்.நல்லதம்பி, செயற்குழு உறுப்பினா் ராஜகோபால், தொழில் முனைவோா் மேம்பாட்டுப் பயிற்சி நிறுவன மேலாளா் என்.மோகன்ராஜ், வேளாண் மற்றும் தோட்டக்கலைத் துறையைச் சோ்ந்த அலுவலா்கள் தமிழரசு, ஜெயஸ்ரீ, ஆனந்த், ஸ்ரீவித்யா உள்ளிட்டோா் கலந்து கொண்டனா்.