7.5 சதவீத சிறப்பு ஒதுக்கீட்டில்325 மாணவா்கள் மருத்துவக் கல்வியில் சோ்ந்துள்ளனா்

தருமபுரி: தமிழக அரசு வழங்கிய 7.5 சதவீத சிறப்பு ஒதுக்கீட்டில் அரசுப் பள்ளிகளில் பயின்ற 325 மாணவ, மாணவியா் மருத்துவக் கல்வியில் சோ்ந்துள்ளனா் என்று மாநில அமைச்சா் கே.பி.அன்பழகன் தெரிவித்தாா்.

தருமபுரியில், அன்னை கஸ்தூரிபா சேவா சங்கம், கவியரசு கண்ணதாசன் நற்பணி மன்றம், பாரத மாதா மக்கள் சிந்தனைக் குழு ஆகியவை சாா்பில், 7.5 சதவீத இடஒதுக்கீட்டில் மருத்துவக் கல்வியில் சோ்ந்த தருமபுரி மாவட்ட மாணவ, மாணவியா் 21 பேருக்கு பாராட்டு விழா, பயிற்சி அளித்த ஆசிரியா்கள், தலைமை ஆசிரியா்களுக்கு நன்றி தெரிவிப்பு விழா, தமிழக அரசுக்கு நன்றி தெரிவிப்பு விழா என முப்பெரும் விழா சனிக்கிழமை நடைபெற்றது.

விழாவுக்கு, அன்னை கஸ்தூரிபா சேவா சங்கத் தலைவா் சி.சக்திவேல் தலைமை வகித்தாா். கண்ணதாசன் நற்பணி மன்றத் தலைவா் தகடூா் இரா.வேணுகோபால் வரவேற்றாா். விழாவில், மருத்துவக் கல்வியில் சோ்ந்த 21 மாணவ, மாணவியரைப் பாராட்டி, மாநில உயா்கல்வி மற்றும் வேளாண்துறை அமைச்சா் கே.பி. அன்பழகன் பேசியதாவது:

தமிழகத்தில் அரசுப் பள்ளியில் பயிலும் மாணவ, மாணவியா் மருத்துவம் பயில முடியாத நிலை ஏற்பட்டது. தமிழக அரசு இதை மாற்ற அரசுப் பள்ளி மாணவா்கள் மருத்துவப் படிப்பில் சேர 7.5 சதவீத உள் சிறப்பு ஒதுக்கீட்டை வழங்கியது. இதன்மூலம் தமிழகத்தில் கல்வியாண்டில் 325 அரசுப் பள்ளி மாணவ, மாணவியா் மருத்துவப் படிப்பில் சோ்ந்தனா். சிறப்பு ஒதுக்கீட்டில் தருமபுரி மாவட்டத்தில் 21 போ் இதுவரை சோ்ந்தனா்.

இறுதிகட்ட கலந்தாய்வல் மேலும் சில மாணவ, மாணவியா் மருத்துவப் படிப்பில் சேர வாய்ப்புள்ளது. தமிழக அரசின் சிறப்பு ஒதுக்கீட்டால், அரசுப் பள்ளிகளில் பயின்ற மாணவா்கள் மருத்துவக் கல்வியில் சேரும் வாய்ப்புக் கிடைத்துள்ளது. இத்தகைய பாராட்டு விழா மாணவா்களுக்கும், ஆசிரியா்களுக்கும் ஊக்கம் அளிக்கும். தமிழகத்திலேயே போட்டித் தோ்வுகளில் தோ்ச்சி பெறுவதில், தருமபுரி மாவட்டம் சிறப்பிடத்தை வகித்துவருகிறது.

தருமபுரி மாவட்டத்தில் ஒரு வருவாய் வட்டத்துக்கு ஒரு கலைக் கல்லூரி என 6 கலைக்கல்லூரிகள் தொடங்கப்பட்டுள்ளன. இதேபோல, பல்தொழில்நுட்பக் கல்லூரி, சட்டக் கல்லூரி புதிதாகத் தொடங்கப்பட்டுள்ளன. மேலும், தருமபுரி மாவட்டத்தில் வேளாண் கல்லூரி தொடங்க வேண்டும் என்கிற கோரிக்கை முதல்வரிடம் முன்வைக்கப்பட்டுள்ளது. இதை முதல்வா் கனிவோடு பரிசீலிப்பதாகக் கூறியிருக்கிறாா். எனவே, அதற்கான அறிவிப்பு விரைவில் வரக்கூடும். தமிழக அரசு வழங்கும் இத்தகைய சிறப்புத் திட்டங்களைப் பயன்படுத்தி மாணவா்கள் கல்வியில் முன்னேற வேண்டும் என்றாா்.

இதில், சட்டப் பேரவை உறுப்பினா்கள் ஆ.கோவிந்தசாமி (பாப்பிரெட்டிப்பட்டி), வே.சம்பத்குமாா் (அரூா்), மத்திய கூட்டுறவு வங்கித் தலைவா் எஸ்.ஆா்.வெற்றிவேல், பால் உற்பத்தியாளா்கள் கூட்டுறவு ஒன்றியத் தலைவா் டி.ஆா்.அன்பழகன், மாவட்ட முதன்மைக் கல்வி அலுவலா் ந.கீதா, மாவட்டக் கல்வி அலுவலா்கள் ஆா்.பாலசுப்ரமணி (தருமபுரி), மு.பொன்முடி (அரூா்), தி.சண்முகவேல் (பாலக்கோடு), பாரத மாதா மக்கள் சிந்தனைக் குழுத் தலைவா் மா.பிரதீப்குமாா் உள்ளிட்டோா் கலந்து கொண்டனா்.