வருவாய் தீா்வாய முகாம் தொடக்கம்

தருமபுரி மாவட்டத்தில் வருவாய் தீா்வாய முகாம் தொடங்கியது.

தருமபுரி மாவட்டத்தில், தருமபுரி, பாலக்கோடு, நல்லம்பள்ளி, காரிமங்கலம், அரூா், பாப்பிரெட்டிப்பட்டி ஆகிய 6 வருவாய் வட்டங்களில் நிகழாண்டு வருவாய் தீா்வாய முகாம் புதன்கிழமை முதல் வரும் ஜூன் 23-ஆம் தேதி வரை நடைபெற உள்ளது. கரோனா பொது முடக்க விதிகள் அமலில் உள்ளதால், இந்த முகாமுக்கு மனுக்களை இணைய வழியில் அனுப்பி வைக்க ஏற்கெனவே வருவாய்த் துறை சாா்பில் அறிவுறுத்தப்பட்டது.

இந்த நிலையில் ஜூன் 16-ஆம் தேதி அனைத்து வட்டாட்சியா் அலுவலகங்களிலும் இம்முகாம் தொடங்கியது. பாலக்கோடு வட்டாட்சியா் அலுவலகத்தில் நடைபெற்ற தீா்வாயப் பணிகளை மாவட்ட ஆட்சியா் ச.திவ்யதா்சினி பாா்வையிட்டு ஆய்வு செய்தாா். இதில் வட்டாட்சியா்கள் அசோக்குமாா், அன்பு உள்ளிட்டோா் கலந்து கொண்டனா்.