கூட்டுறவு வார விழா: 1,127 பயனாளிகளுக்கு கடனுதவி

 தருமபுரியில் நடைபெற்ற கூட்டுறவு வார விழாவில், 1,127 பயனாளிகளுக்கு ரூ. 6.99 கோடியில் கடனுதவிகளை வேளாண், உழவா் நலத்துறை அமைச்சா் எம்.ஆா்.கே.பன்னீா் செல்வம் வழங்கினாா்.

தருமபுரி அருகே கடகத்தூரில் 68-ஆவது அனைத்திந்திய கூட்டுறவு வார விழா வியாழக்கிழமை நடைபெற்றது. இந்த விழாவில், 1,127 பயனாளிகளுக்கு ரூ. 6.99 கோடி மதிப்பில் கடனுதவிகள், சிறப்பாக செயல்பட்ட சங்கங்களுக்கு கேடயங்களை வழங்கி அமைச்சா் எம்.ஆா்.கே.பன்னீா்செல்வம் பேசியதாவது:

தமிழகத்தில் முந்தைய திமுக ஆட்சியில் ரூ. 7,000 கோடி கடன் தள்ளுபடி செய்யப்பட்டது. அதேபோல, தற்போதைய முதல்வா் மு.க.ஸ்டாலின் கூட்டுறவு வங்கிகளில் நகைக் கடன் தள்ளுபடி செய்யப்படும் என தோ்தல் நேரத்தில் அளித்த வாக்குறுதியை நிறைவேற்றியுள்ளாா்.

நிகழ் நிதியாண்டில் அக். 2021 வரை 9,286 விவசாயிகளுக்கு ரூ. 64 கோடியே 82 லட்சம் பயிா்க் கடன் வழங்கப்பட்டுள்ளது. இதர கடன்கள் 18,754 நபா்களுக்கு ரூ. 212 கோடியே 68 லட்சம் வழங்கப்பட்டுள்ளது. விவசாயிகளுக்கு வட்டியில்லா பயிா்க்கடன் வழங்கப்பட்டு வருகிறது. விவசாயிகள் பெற்ற பயிா்க் கடனை தவணை தவறாது திரும்ப செலுத்துவோருக்கு 7 சதவீத வட்டித் தொகை முழுவதையும் அரசே ஏற்றுக் கொண்டு வட்டியே இல்லாத விவசாயக் கடன் வழங்கப்பட்டு வருகிறது.

தருமபுரி மாவட்டத்தில் வறட்சியான பகுதிகளை பசுமையாக மாற்றுவதற்கு காவிரி மிகை நீா்த் திட்டத்தை செயல்படுத்த நடவடிக்கை மேற்கொள்ளப்படும். திமுக ஆட்சியில் தருமபுரி மாவட்டத்தில் முதன்முதலாக சிறிய அளவில் தொடங்கப்பட்ட மகளிா் சுயஉதவிக் குழுக்கள் தற்போது ஆலமரமாக வளா்ந்து மாநிலம் முழுவதும் சிறப்பாக செயல்பட்டு வருகிறது. மகளிா் முன்னேற்றத்துக்காக மகளிா் சுயஉதவிக் குழுக்களுக்கு சுழல் நிதி, பல்வேறு கடன் உதவிகளையும் அரசு வழங்கி வருகிறது.

தருமபுரி மாவட்டத்தை பசுமையான, வளமையான மாவட்டமாக உருவாக்கிட முழுமுயற்சியுடன் பாடுபடுவேன். இதற்கு அனைவரும் முழு ஒத்துழைப்பு அளிக்க வேண்டும் என்றாா்.

மாவட்ட ஆட்சியா் ச.திவ்யதா்சினி தலைமையில் நடைபெற்ற இந்த விழாவில், சட்டப் பேரவை உறுப்பினா்கள் ஜி.கே.மணி (பென்னாகரம்), எஸ்.பி.வெங்கேடஸ்வரன் (தருமபுரி), சட்டப் பேரவை முன்னாள் உறுப்பினா்கள் தடங்கம் பெ.சுப்பிரமணி, பிஎன்பி.இன்பசேகரன், கூடுதல் ஆட்சியா் இரா.வைத்திநாதன், கூட்டுறவு சங்கங்களின் இணைப் பதிவாளா் சு.ராமதாஸ், கூட்டுறவு சா்க்கரை ஆலை மேலாண் இயக்குநா்கள் அ.சங்கா் (பாலக்கோடு), எச்.ரகமதுல்லா கான் ( அரூா்), அரசு அலுவலா்கள் கலந்துகொண்டனா்.