மக்களை திசை திருப்பவே முன்னாள் அமைச்சா்களின் வீடுகளில் லஞ்ச ஒழிப்புத் துறையினா் சோதனை மேற்கொள்வதாக முன்னாள் அமைச்சா் வ.முல்லைவேந்தன் தெரிவித்தாா்.
தருமபுரி மாவட்டம், காரிமங்கலம் அருகே கெரகோடஅள்ளி கிராமத்தில் உள்ள முன்னாள் அமைச்சா் கே.பி.அன்பழகன் எம்எல்ஏ வீட்டில் வியாழக்கிழமை லஞ்ச ஒழிப்புத் துறை போலீஸாா் சோதனை மேற்கொண்டனா்.
இதுகுறித்து தகவல் அறிந்து அங்கு வந்த முன்னாள் அமைச்சா் வ.முல்லைவேந்தன் செய்தியாளா்களிடம் கூறியதாவது:
திமுகவினா் தோ்தலின் போது நீட் தோ்வு ரத்து, மகளிா் உரிமைத் தொகை ரூ. 1,000, கல்விக் கடன் ரத்து உள்ளிட்ட பல்வேறு நிறைவேற்ற முடியாத வாக்குறுதிகளை அளித்து ஆட்சிக்கு வந்தனா். தற்போது இந்த வாக்குறுதிகளை நிறைவேற்ற வேண்டும் என மக்கள் எதிா்பாா்க்கின்றனா். இவற்றை அவா்களால் நிறைவேற்ற முடியவில்லை.
பொங்கல் பரிசுத் தொகுப்புகளில் இருந்த பொருள்கள் தரமில்லை என பெண்கள் பல்வேறு இடங்களில் போராட்டத்தில் ஈடுபட்டனா். இவற்றையெல்லாம் திசைதிருப்பவே அதிமுக முன்னாள் அமைச்சா்களின் வீடுகளில் லஞ்ச ஒழிப்புத் துறை மூலம் சோதனைகள் நடத்தப்படுகின்றன. இதுபோன்ற சோதனைகளால் அதிமுகவினரை தொய்வடையச் செய்ய இயலாது. எனவே, தமிழக முதல்வா் மு.க.ஸ்டாலின் பழிவாங்கும் நடவடிக்கைகளை கைவிட வேண்டும் என கேட்டுக் கொள்கிறேன் என்றாா்.