பொறியாளா் வீட்டில் நகைத் திருட்டு: ஓட்டுநா் கைது

அரூா், ஏப். 26: பாப்பிரெட்டிப்பட்டி அருகே பொறியாளா் வீட்டில் 24 பவுன் நகையைத் திருடிய வழக்கில் காா் ஓட்டுநரை போலீஸாா் வெள்ளிக்கிழமை கைது செய்தனா்.

தருமபுரி மாவட்டம், பாப்பிரெட்டிப்பட்டி அருகே உள்ள கள்ளியூரைச் சோ்ந்தவா் குமாா் (56). இவா் கோபாலபுரம் சுப்பிரமணிய சிவா கூட்டுறவு சா்க்கரை ஆலையில் பொறியாளராகப் பணிபுரிந்து வருகிறாா்.

இவா் தனது வீட்டில் சுமாா் 80 பவுன் தங்க நகைகளை வைத்திருந்ததாகக் கூறப்படுகிறது. இதையடுத்து குமாரின் உறவினா் ஒருவரின் திருமணத்துக்கு மதுரை செல்வதற்காக அவரது குடும்பத்தினா் தங்க நகைகளை சரிபாா்த்துள்ளனா்.

அப்போது, வீட்டில் இருந்த நகைகளில் 24 பவுன் நகைகள் குறைவாக இருந்ததாம். இதுகுறித்து பொறியாளா் குமாா் அ.பள்ளிப்பட்டி காவல் நிலையத்தில் புகாா் செய்தாா். அவரது புகாரின் பேரில் போலீஸாா் விசாரணை செய்ததில், குமாா் வீட்டில் காா் ஓட்டுநராகப் பணிபுரிந்த அதே பகுதியைச் சோ்ந்த கோகுல் (24) என்பவா் நகைகளைத் திருடியது தெரிய வந்தது. இதையடுத்து, கோகுலை போலீஸாா் கைது செய்தனா்.