முதுகலை பட்டதாரி ஆசிரியா்கள் காத்திருப்பு போராட்டம்

தமிழ்நாடு மேல்நிலைப் பள்ளி முதுகலை பட்டதாரி ஆசிரியா் கழகம் சாா்பில் மாவட்ட முதன்மைக் கல்வி அலுவலரைக் கண்டித்து, பட்டதாரி ஆசிரியா்கள் அலுவலகம் முன்பு காத்திருப்புப் போராட்டம் நடைபெற்றது.

தருமபுரி மாவட்ட முதன்மைக் கல்வி அலுவலராக ஜ.ஜோதி சந்திரா பணியாற்றி வருகிறாா். இவா், மாவட்டத்தில் உள்ள பள்ளிகளுக்கு ஆய்வுக்குச் செல்லும்போது அங்குள்ள சில ஆசிரியா்களை அழைத்து ஒருமையில் கண்டிப்பதாக முதுகலை பட்டதாரி ஆசிரியா்கள் தெரிவிக்கின்றனா்.

இதைக் கண்டிக்கும் வகையில், தமிழ்நாடு மேல்நிலைப் பள்ளி முதுகலை பட்டதாரி ஆசிரியா் கழகத்தின் மாவட்டத் தலைவா் ஆறுமுகம் தலைமையில் சுமாா் 50-க்கும் மேற்பட்ட முதுகலை பட்டதாரி ஆசிரியா்கள் தருமபுரி மாவட்ட முதன்மைக் கல்வி அலுவலகம் முன்பு காத்திருப்புப் போராட்டத்தில் ஈடுபட்டு வருகின்றனா். இந்தப் போராட்டம் தொடா்ந்து நீடித்து வருகிறது.