57 டாஸ்மாக் கடைகள் மூடல்: தருமபுரியில் மதுப்பிரியா்கள் மறியல்

தருமபுரி மாவட்டத்தில் 57 டாஸ்மாக் கடைகள் ஞாயிற்றுக்கிழமை மூடப்பட்டதால், மதுபானம் கிடைக்காமல் ஏமாற்றமடைந்த மதுப்பிரியா்கள் பென்னாகரம் சாலையில் மறியலில் ஈடுபட்டனா்.

டாஸ்மாக் கடைகளில் அமல்படுத்தப்பட்டுள்ள புதிய விற்பனை நடைமுறைகளைக் கண்டித்து பணியாளா்கள் வேலைநிறுத்தத்தில் ஈடுபட்டதால் கடைகள் மூடப்பட்டன.

டாஸ்மாக் கடைகளில் காலி மதுப்புட்டிகளைத் திரும்பப் பெறும் திட்டத்தின்படி, அவற்றை ஒப்படைப்பவா்களுக்கு ரூ. 10 வழங்கப்படுகிறது. இதற்காக, மதுபானத்தின் விலையுடன் கூடுதலாக ரூ. 10 வசூலிக்கவும், ரூ. 1,000-க்கு மேல் மதுபானம் வாங்குவோரிடம் க்யூஆா் குறியீடு மூலம் பணமில்லாப் பரிவா்த்தனை மேற்கொள்ளவும் அரசு உத்தரவிட்டுள்ளது. மேலும், காலி மதுப்புட்டிகளைத் திரும்பப் பெறும்போது ஸ்கேன் செய்யவும் அறிவுறுத்தப்பட்டுள்ளது.

ஒரு கடைக்கு இரண்டு ஸ்கேனிங் இயந்திரங்கள் மட்டுமே வழங்கப்பட்டுள்ள நிலையில், புதிய நடைமுறைகளால் விற்பனையில் காலதாமதம் ஏற்படுவதுடன், பணியாளா்களின் பணிச்சுமையும் அதிகரிப்பதாக ஊழியா்கள் தெரிவித்துள்ளனா்.

எனவே, காலி மதுப்புட்டிகளைத் திரும்பப் பெறும் பணிக்கு தனியாா் ஒப்பந்த நிறுவனத்தின் மூலம் பணியாளா்களை நியமிக்க வேண்டும்; கூடுதல் ஸ்கேனிங் இயந்திரங்கள் வழங்க வேண்டும் என்பன உள்ளிட்ட கோரிக்கைகளை வலியுறுத்தி டாஸ்மாக் பணியாளா்கள் வேலைநிறுத்தத்தில் ஈடுபட்டனா்.

இதனால் மாவட்டத்தில் 57 கடைகள் மூடப்பட்டிருந்தன. இதுகுறித்து அறியாமல் பகல் 12 மணிக்கு மேல் கடைகளுக்கு வந்த மதுப்பிரியா்கள் ஏமாற்றமடைந்து பென்னாகரம் சாலையில் மறியலில் ஈடுபட்டனா். அங்கு வந்த நகரக் காவல் துறையினா் அவா்களை அப்புறப்படுத்தி போக்குவரத்தை சீரமைத்தனா்.