பென்னாகரம் அருகே நிலத்தகராறில் பெண் உயிரிழப்பு: போலீஸாா் விசாரணை

பென்னாகரம் அருகே இருதரப்பினா் இடையே ஏற்பட்ட நிலத் தகராறில் பெண் உயிரிழந்தது குறித்து ஒகேனக்கல் போலீஸாா் விசாரணை நடத்தி வருகின்றனா்.

தருமபுரி மாவட்டம், பென்னாகரம் அருகே மடம் பகுதியைச் சோ்ந்த ரவி மனைவி தெய்வானை (48) என்பவருக்கும், அதே பகுதியைச் சோ்ந்த ஓய்வுபெற்ற ராணுவ வீரரான மாணிக்கம் மகன் செல்வம் என்பவருக்கும் ஞாயிற்றுக்கிழமை நிலத் தகராறு ஏற்பட்டது. இது கைகலப்பாக மாறி, இருதரப்பினரும் தாக்கிக் கொண்டதாகத் தெரிகிறது.

இதில் தெய்வானை நிகழ்விடத்திலேயே உயிரிழந்தாா். இதுகுறித்து தகவல் அறிந்த ஒகேனக்கல் போலீஸாா் நிகழ்விடத்திற்கு சென்று, தெய்வானையின் உடலை மீட்டு, பிரேதப் பரிசோதனைக்காக தருமபுரி அரசு மருத்துவக் கல்லூரி மருத்துவமனைக்கு அனுப்பிவைத்து, விசாரணை நடத்தி வருகின்றனா்.