கொதிகலன் வெடித்து தொழிலாளி இறந்த வழக்கில் மேலாளர் உள்பட இருவர் கைது

ஒசூரில் உள்ள தனியார் ஆலையில் கொதிகலன் வெடித்து தொழிலாளி உயிரிழந்த வழக்கில் மேலாளர் உள்பட இருவரை போலீஸார் திங்கள்கிழமை கைது செய்தனர். ஒசூர் சிப்காட் பகுதியில் தனியார் தொழில்சாலையில் பணியாற்றி வந்த கர்நாடக மாநிலம், அத்திப்பள்ளி அருகே உள்ள பல்லுர் கிராமத்தைச் சேர்ந்த சீனிவாச ரெட்டி (55) கடந்த செப். 12இல் கொதிகலன் வெடித்தில் உயிரிழந்தார்.

இதுதொடர்பாக சிப்காட் போலீஸார் வழக்குப் பதிவு செய்து, விசாரணை நடத்தினர்.

விசாரணையில், உரிய முறையில் பாய்லரை பராமரிக்காத காரணத்தால் விபத்து நடந்தது தெரியவந்தது. இதையடுத்து, திருநெல்வேலி மாவட்டத்தைச் சேர்ந்த பாய்லர் ஆபரேட்டர் தம்புராஜ் (25), ஒசூர் அடுத்த அட்டகுறுக்கி பகுதியைச் சேர்ந்த ஆலை மேலாளர் வேடியப்பன் (40) ஆகிய இருவரையும் போலீஸார் கைது செய்தனர். தலைமறைவாகியுள்ள அந்த தொழில்சாலை உரிமையாளர் அருள்முக சண்முகத்தைத் தேடி வருகின்றனர்.