விஷப் பூச்சி கடித்து பெண் சாவு

காவேரிப்பட்டணம் அருகே விஷப் பூச்சி கடித்து பெண் உயிரிழந்தது குறித்து போலீஸார் விசாரணை நடத்தி வருகின்றனர்.

கிருஷ்ணகிரி மாவட்டம், காவேரிப்பட்டணம் அருகே உள்ள சந்தாபுரத்தைச் சேர்ந்தவர் சுப்பிரமணி (65). இவரது மனைவி ராஜம்மாள் (60). இவர் அந்தப் பகுதியில் நடைபெறும் மகாத்மா காந்தி தேசிய ஊரக வேலை உறுதித் திட்டத்தில் சனிக்கிழமை பணிக்குச் சென்றார்.

அப்போது, அவரை விஷப் பூச்சி கடித்ததாம். ஆனால், அவர் தொடர்ந்து வேலையில் ஈடுபட்டாராம். பின்னர், அன்று மாலை காவேரிப்பட்டணம் அரசு மருத்துவமனைக்கு கொண்டு செல்லப்பட்ட ராஜம்மாள், உயர் சிகிச்சைக்காக கிருஷ்ணகிரி அரசு மருத்துவமனைக்கு கொண்டு செல்லும் வழியிலே உயிரிழந்தார். இதுகுறித்து காவேரிப்பட்டணம் போலீஸார் வழக்குப் பதிந்து விசாரணை நடத்தி வருகின்றனர்.