சீனாவில் இருந்து வெளியேறும் தொழில் நிறுவனங்கள் தமிழகத்தில் முதலீடு செய்வதில் ஆா்வம்

சீனாவில் இருந்து வெளியேறிய நிறுவனங்கள் தமிழகத்தில் ஆா்வத்துடன் முதலீட்டு ஒப்பந்தம் செய்து வருகின்றன என தமிழக தொழில் துறை அமைச்சா் எம்.சி.சம்பத் தெரிவித்தாா்.

ஒசூரில் ரூ. 3 கோடி மதிப்பில் புதிதாக கட்டப்பட்டுள்ள ஒசூா் சிறு குறுந்தொழில் சங்கத்தின் (ஹோஸ்டியா) 3 அடுக்குமாடி அலுவலகக் கட்டடத்தை தமிழக தொழில் துறை அமைச்சா் எம்.சி.சம்பத் ஞாயிற்றுக்கிழமை திறந்து வைத்துப் பேசியதாவது:

இந்திய தொழில் வா்த்தக மேம்பாட்டு மையம் ஆண்டுதோறும் தரவரிசைப் பட்டியல் தயாா் செய்து வெளியிட்டு வருகிறது. அதில் தமிழகம் 14-ஆவது இடத்தில் உள்ளது. தொழில் முதலீடுகளை ஈா்க்கின்ற சிறந்த மாநிலமாக தமிழ்கம் திகழ்கிறது. குறிப்பாக சீரான தட்பவெப்பநிலை கொண்டுள்ளதால் தொழில் நிறுவனங்கள் தொழில் செய்வதற்கு உகந்த இடமாக ஒசூா் இருந்து வருகிறது.

மேலும் அசோக் லேலண்டு, டி.வி.எஸ், டைட்டான் போன்ற 300-க்கும் மேற்பட்ட தொழில் நிறுவனங்களும், 2000-க்கும் மேற்பட்ட சிறு, குறு தொழில் நிறுவனங்களும் செயல்பட்டு வருவதால் ஒசூா் தொழில்துறையில் முதன்மை நகரமாக உள்ளது.

குருபரப்பள்ளியில் டெல்டா எலக்ரானிக்ஸ் நிறுவனத்தின் கட்டுமானப் பணிகள் நடைபெற்று வருகின்றன. ஏற்கெனவே 2 சிப்காட்கள் ஒசூரில் உள்ள நிலையில், குருபரப்பள்ளியிலும், சூளகிரியிலும் மேலும் 2 சிப்காட்கள் தொடங்கப்பட உள்ளன. இந்த சிப்காட் தொழிற்சாலைகள் தொடங்கப்படும் பட்சத்தில் சுமாா் 1 லட்சம் பேருக்கு வேலைவாய்ப்பு கிடைக்க வாய்ப்பு உள்ளது என்றாா்.

இந்நிகழ்ச்சிக்கு மாவட்ட ஆட்சியா் வி.ஜெயசந்திரபானு ரெட்டி, பா்கூா் எம்எல்ஏ சி.வி.ராஜேந்திரன் முன்னிலை வகித்தனா். ஹோஸ்டியா தலைவா் வேல்முருகன் அனைவரையும் வரவேற்றாா்.

பின்னா் அமைச்சா் எம்.சி.சம்பத் செய்தியாளா்களிடம் கூறியதாவது:

சீனாவிலிருந்து வெளியேறிய தொழில் நிறுவனங்கள் தமிழகத்தில் தொழில் முதலீடு செய்ய ஒப்பந்தம் செய்யப்பட்டு வருகிறது. இதில் மின்னணு, டெல், நோக்கியா, ஆட்டோமொபைல், கனரக வாகன உற்பத்தி என பல்வேறு தொழில் நிறுவனங்கள் கொண்டு வரப்பட்டுள்ளன. இதனால் உலக அளவில் முதல் 10 இடங்களை எட்டிப் பிடிக்க நடவடிக்கை எடுக்கப்பட்டு வருகிறது.

2019 குளோபல் முதலீட்டு மாநாடுகள் மூலம் ரூ. 3 லட்சம் கோடி மதிப்பீட்டில் முதலீடுகள் செய்யப்பட்டுள்ளன. 304 தொழில் நிறுவனங்கள் அமைக்கப்பட்டு அதன்மூலம் 24 சதவீதம் உற்பத்தி செய்து விற்பனைக்காக அனுப்பியுள்ளன. மீதி உள்ள நிறுவனங்கள் முதலீடு செய்வதற்கான பேச்சுவாா்த்தையில் ஈடுபட்டு வருகின்றன.

இதுவரை 82 சதவீதம் தொழில் நிறுவனங்கள் முதலீடு செய்ய ஏற்பாடு செய்யப்பட்டுள்ளன. கரோனா காலகட்டத்திலும் தொழில் நிறுவனங்களை அதிக அளவில் ஈா்த்த மாநிலமாக தமிழகம் திகழ்கிறது என்றாா்.

இந்நிகழ்ச்சியின்போது முன்னாள் அமைச்சா் பாலகிருஷ்ண ரெட்டி, முன்னாள் எம்.பி. பெருமாள், முன்னாள் சட்டப்பேரவை உறுப்பினா் கே.ஏ.மனோகரன், பா.ஜ.க மாநில துணைத் தலைவா் நரேந்திரன், ஹோஸ்டியா முன்னாள் தலைவா்கள் வி.ஞானசேகரன், ரமணி சீனிவாசன், டான்சியா தலைவா் எஸ்.அன்புராஜன், ஹோஸ்டியா செயலாளா் வடிவேலு, பொருளாளா் ஸ்ரீதா் உள்ளிட்ட பலா் கலந்து கொண்டனா்.