குழியில் தவறி விழுந்த காவலா் படுகாயம்

சூளகிரி அருகே குழியில் தவறி விழுந்த காவலா் படுகாயம் அடைந்தாா்.

தருமபுரி மாவட்டம், பாலக்கோடு அருகே உள்ள வெல்லன்காடு பகுதியைச் சோ்ந்தவா் ரவி (41). இவா் சூளகிரி காவல் நிலையத்தில் காவலராகப் பணிபுரிந்து வருகிறாா். ஒசூா் - கிருஷ்ணகிரி தேசிய நெடுஞ்சாலை சுண்டகிரி அருகே இரவு ரோந்துப் பணியில் ஈடுபட்டிருந்தாா். அப்போது அவா் சாலையை கடக்க முயன்ற போது குழியில் தவறி விழுந்தாா்.

இதில் பலத்த காயம் அடைந்த அவரை சிகிச்சைக்காக கோவையில் உள்ள தனியாா் மருத்துவமனையில் சோ்த்தனா். இது குறித்து சூளகிரி போலீஸாா் விசாரணை நடத்தி வருகின்றனா்.