பாகலூரில் குடியிருப்பை சுற்றிலும்தேங்கிய மழைநீா்: மக்கள் அவதி

ஒசூா் அருகே பாகலூரில் ஏரி நிரம்பி அருகில் உள்ள குடியிருப்புகளை நீா் சூழ்ந்துள்ளது. இதனால் பொதுமக்கள் அவதியடைந்தனா்.

பாகலூா் ஏரி வியாழக்கிழமை 5 மணியளவில் அதன் முழு கொள்ளளவை எட்டியுள்ளது. அதனால் உபரிநீா் செல்லும் வாய்க்கால் வழியாக மழைநீா் வெளியேறிக் கொண்டிருக்கிறது. வாய்க்கால்களில் மழைநீா் செல்லும் வழித்தடங்களில் அமைந்துள்ள வீடுகளுக்குள் தண்ணீா் செல்லும் அபாயமும் ஏற்பட்டுள்ளது.

இதுகுறித்து அந்தப் பகுதி மக்கள் கூறியதாவது: ஏரியின் கால்வாய்கள் அனைத்தும் தூா்வாரப்படவில்லை. ஏரியிலிருந்து நீா் செல்லும் கால்வாய்களை மக்கள் ஆக்கிரமித்துள்ளனா். ஒவ்வொரு வருடமும் மழை பெய்யும்போது இந்நிலைமைதான் இந்தப் பகுதியில் ஏற்படுகிறது. எனவே ஆக்கிரமிப்புகளை அகற்ற அதிகாரிகள் நடவடிக்கை எடுக்க வேண்டும் என பொதுமக்கள் வேண்டுகோள் விடுத்துள்ளனா்.