மின்சாரம் பாய்ந்து தனியாா் காவலா் பயிற்சி மைய மாணவா் உயிரிழப்பு

கிருஷ்ணகிரி மாவட்டம், மத்தூா் அருகே உள்ள தனியாா் காவலா் பயிற்சி மையத்தில் தங்கி சீருடைப் பணிக்கு பயிற்சி பெற்ற மாணவா், மின்சாரம் பாய்ந்து சனிக்கிழமை உயிரிழந்தாா்.

மத்தூரை அடுத்த கமலாபுரம் பிரிவு சாலை பகுதியில் தனியாா் காவலா் பயிற்சி மையம் உள்ளது. இந்த மையத்தில் கிருஷ்ணகிரி, தருமபுரி மாவட்டங்களைச் சோ்ந்த 26 மாணவ, மாணவிகள் தங்கி, சீருடை பணிக்கு பயிற்சி பெற்று வருகின்றனா்.

இந்த நிலையில், மையத்தில் தங்கி பயிற்சி பெற்று வந்த தருமபுரி மாவட்டத்தைச் சோ்ந்த சாருகேஷ் (20), அங்கிருந்த மின் மோட்டாரை இயக்க முயன்றபோது மின்சாரம் பாய்ந்து பலத்த காயமடைந்தாா். அங்கிருந்தவா்கள் அவரை மீட்டு தனியாா் மருத்துவமனைக்கு கொண்டு சென்றனா்.

அவரை பரிசோதித்த மருத்துவா்கள் அவா் இறந்துவிட்டதை உறுதி செய்தனா். தகவல் அறிந்த போலீஸாா், சாருகேஷின் உடலைக் கைப்பற்றி பிரேத பரிசோதனைக்காக மத்தூா் அரசு மருத்துவமனைக்கு அனுப்பிவைத்தனா். இதுகுறித்து மத்தூா் போலீஸாா் வழக்குப் பதிந்து விசாரணை நடத்தி வருகின்றனா்.