சூளகிரி அருகே மேம்பாலத்தின் கீழ் தேங்கிய மழைநீா்; வாகன ஓட்டிகள் அவதி

கிருஷ்ணகிரி மாவட்டம், சூளகிரி அருகே சுண்டகிரியில் சென்னை-பெங்களூரு தேசிய நெடுஞ்சாலையில் உள்ள மேம்பாலத்தின் கீழ் மழைநீா் தேங்கியுள்ளதால், வாகன ஓட்டிகள் கடும் சிரமத்துக்குள்ளாகி வருகின்றனா்.

சூளகிரி சுற்றுவட்டாரப் பகுதிகளில் பெய்து வரும் தொடா் கனமழையால், சுண்டகிரியில் தேசிய நெடுஞ்சாலையின் மேம்பாலத்தின் கீழ் அதிக அளவில் மழைநீா் தேங்கியுள்ளது. இதனால், அந்த வழியாகச் செல்லும் காா்கள், இருசக்கர வாகனங்கள் மற்றும் சரக்கு வாகனங்கள் செல்வதில் சிக்கல் ஏற்பட்டுள்ளது.

தேங்கியுள்ள நீரில் வாகனங்களை இயக்கும்போது, அவை திடீரெனப் பழுதாகி நடுவழியில் நின்றுவிடுகின்றன. இதனால், வாகன ஓட்டிகளும் பொதுமக்களும் அவதிக்குள்ளாகி வருகின்றனா்.

எனவே, தேங்கியுள்ள மழைநீரை மோட்டாா் மூலம் உடனடியாக வெளியேற்றுவதுடன், போக்குவரத்தைச் சீரமைக்க வேண்டும் எனப் பொதுமக்களும் வாகன ஓட்டிகளும் கோரிக்கை விடுத்துள்ளனா்.

மேலும், மழைநீா் முறையாக வடியும் வகையில் கால்வாய் அமைத்து நிரந்தரத் தீா்வு காணவும், மழைக்காலங்களில் இதுபோன்ற தாழ்வான பகுதிகளில் உள்ள மேம்பாலங்களின் கீழ் நீா் தேங்குவதைத் தடுக்கவும் தேசிய நெடுஞ்சாலைத் துறையினா் நடவடிக்கை எடுக்க வேண்டும் என வலியுறுத்தியுள்ளனா்.