அனுமதியின்றி குளத்தில் மண் எடுத்த 2 லாரிகள், ஜேசிபி இயந்திரம் பறிமுதல்

பரமத்தி அருகே உள்ள இடும்பன் குளத்தில் உரிய அனுமதியின்றி மண் எடுத்த 2 லாரிகள், ஒரு ஜேசிபி இயந்திரத்தைப் பொதுமக்கள் பறிமுதல் செய்து போலீஸாரிடம் சனிக்கிழமை ஒப்படைத்தனர்.

பரமத்தி அருகே சுமார் 360 ஏக்கர் பரப்பளவில் சானிப்பட்டி கிராமத்தில் இடும்பன் குளம் உள்ளது. இக் குளத்துக்குத் தண்ணீர் வரத்து இல்லாததால் அரசு அனுமதியின்றி சுற்றுவட்டாரப் பகுதிகளைச் சேர்ந்த சிலர் ஆக்கிரமித்துள்ளனர்.

இக்குளத்தில் அப்பகுதியைச் சேர்ந்த சிலர் அடிக்கடி குளத்து மண்ணை வெட்டி எடுத்து தனியார் செங்கல் சூளைகளுக்கு விற்பனை செய்து வந்ததாகக் கூறப்படுகிறது. இந் நிலையில் சனிக்கிழமை இரவு சிலர் இடும்பன் குளம் பகுதியில் ஜே.சி.பி. இயந்திரம் மூலம் மண்ணை வெட்டி எடுத்து லாரிகள் மூலம் அனுப்பி வந்துள்ளனர்.

இதுகுறித்துத் தகவல் அறிந்த அப்பகுதியைச் சேர்ந்த பொதுமக்கள் நள்ளிரவில் ஒன்று திரண்டு லாரிகளையும் ஜே.சி.பி. வாகனத்தையும் தடுத்து நிறுத்தி பரமத்தி காவல் நிலையத்தில் ஒப்படைத்தனர். தகவல் அறிந்து அங்கு வந்த பரமத்திவேலூர் வட்டாட்சியர் லோகநாதன், பரமத்தி காவல்துறையினர் மற்றும் வருவாய்த்துறையினர் மண் வெட்டி எடுக்கப்பட்ட இடத்தை பார்வையிட்டனர். இதுவரை எவ்வளவு மண் எடுக்கப்பட்டுள்ளது என்பது குறித்தும் விசாரணை நடத்தினர்.

பரமத்தி வேலூர் வட்டாட்சியர் லோகநாதன், இது தொடர்பாக உரிய நடவடிக்கை எடுக்கப்படும் என தெரிவித்தார்.