அரசுப் பள்ளிகளில் மழலையர் வகுப்பு: தமிழ்நாடு ஆசிரியர் கூட்டணி வரவேற்பு

அரசுப் பள்ளிகளில் மழலையர் வகுப்புகள் தொடங்கப்படும் என்ற அறிவிப்பை தமிழ்நாடு ஆசிரியர் கூட்டணி வரவேற்றுள்ளது.
இதுகுறித்து கூட்டணி மாநிலத் தலைவர் செ.முத்துசாமி வெளியிட்ட அறிக்கை: அரசுப் பள்ளிகளில் எல்.கே.ஜி, யு.கே.ஜி. வகுப்புகள் வரும் ஜனவரி 21-ஆம் தேதி முதல் தொடங்கப்படும் என்றும், வரும் பொங்கல் பண்டிகை முதல் கல்விக்கு என தனி தொலைக்காட்சி சேனல் தொடங்கப்பட்டு கல்வி நிகழ்ச்சிகள் ஒளிபரப்பப்படும் என்றும் தமிழக பள்ளிக் கல்வித் துறை அமைச்சர் கே.ஏ.செங்கோட்டையன் அறிவித்துள்ளார்.
இந்த அறிவிப்புகளை தமிழ்நாடு ஆசிரியர் கூட்டணி வரவேற்று பாராட்டுகிறது. கடந்த 10 ஆண்டுகளாக கல்வி நிகழ்ச்சிகளுக்கு என தனி சேனல் தொடங்க வேண்டும் என மத்திய, மாநில அரசுகளுக்கு, கூட்டணி சார்பில் தொடர்ந்து கோரிக்கை வைத்து வந்தோம்.
அதேபோல், அரசுப் பள்ளிகளில் எல்.கே.ஜி, யு.கே.ஜி. வகுப்புகள் தொடங்க வேண்டும் என தமிழக அரசிடம் தொடர்ந்து வலியுறுத்தி வந்தோம். அக்கோரிக்கையை நிறைவேற்றும் வகையில், அறிவிப்பு வெளியிட்ட தமிழக பள்ளிக் கல்வித் துறை அமைச்சரை கூட்டணி பாராட்டுகிறது.