நின்ற லாரி மீது இருசக்கர வாகனம் மோதியதில் கரூா் டி.என்.பி.எல். ஒப்பந்தத் தொழிலாளி பலி

நல்லூா் அருகே நின்ற லாரி மீது மோதியதில் இருசக்கர வாகனத்தில் சென்ற கரூா் டி.என்.பி.எல். ஒப்பந்தத் தொழிலாளி பலியானாா். அவரது மனைவியும் மகளும் காயமடைந்தனா்.

கரூா் மாவட்டம், புகளூா், முருகம்பாளையத்தைச் சோ்ந்தவா் தமிழ்ச்செல்வன் (57). இவா், கரூா் டி.என்.பி.எல். ஆலையில் ஒப்பந்தத் தொழிலாளியாகப் பணியாற்றி வந்தாா்.

ஆடிப்பெருக்கை முன்னிட்டு தமிழ்ச்செல்வன் தனது மனைவி சீதாலட்சுமி (40), மகள் யுவஷாலினி (20) ஆகியோருடன் நாமக்கல் மாவட்டம், நல்லூா் அருகே ஆவாரங்காடுபுதூரில் உள்ள உறவினா் வீட்டுக்கு இருசக்கர வாகனத்தில் சென்றாா். பின்னா் அங்கிருந்து மூவரும் சொந்த ஊருக்கு புதன்கிழமை திரும்பிக் கொண்டிருந்தனா்.

ஆவாரங்காடுபுதூா் மூன்று சாலை பிரிவு அருகே சென்றபோது சாலையோரத்தில் நின்ற லாரியின் பின்புறத்தில் எதிா்பாராமல் அவா்கள் சென்ற இருசக்கர வாகனம் மோதியது. இதில் தமிழ்ச்செல்வனும் சீதாலட்சுமியும் படுகாயமடைந்தனா்.

அவா்களை அப்பகுதி மக்கள் மீட்டு நாமக்கல் அரசு மருத்துவமனைக்கு அனுப்பிவைத்தனா். அங்கு தமிழ்ச்செல்வன் உயிரிழந்தாா். பின்னா் அவரது மனைவி சீதாலட்சுமி தீவிர சிகிச்சைக்காக சேலம், தனியாா் மருத்துவமனையில் அனுமதிக்கப்பட்டு சிகிச்சை பெற்று வருகிறாா். மகள் யுவஷாலினி லேசான காயங்களுடன் உயிா் தப்பினாா்.

இதுகுறித்து நல்லூா் போலீஸாா் வழக்குப் பதிந்து சாலையோரத்தில் அஜாக்கிரதையாக லாரியை நிறுத்தியதாக சேலம் மாவட்டம், எடப்பாடி அருகே ஆலச்சம்பாளையத்தைச் சோ்ந்த லாரி ஓட்டுநரான ஆறுமுகத்தை (35) கைது செய்தனா்.