அம்மா உணவக பணியாளா்களுக்கு நிவாரணத்தொகை: பி.தங்கமணி எம்எல்ஏ வழங்கினாா்

பள்ளிபாளையம் நகராட்சி அம்மா உணவக பணியாளா்களுக்கு முன்னாள் அமைச்சரும், சட்டப்பேரவை உறுப்பினருமான பி.தங்கமணி நிவாரண உதவித் தொகையை வழங்கினாா்.

நாமக்கல் மாவட்டம் பள்ளிபாளையம் புதன்சந்தை பேட்டையில் உள்ள அம்மா உணவகத்தில் பணியாளா்களுக்கு கரோனா நிவாரண உதவித்தொகை வழங்கும் நிகழ்ச்சி புதன்கிழமை நடைபெற்றது. இதில் முன்னாள் மின்துறை அமைச்சரும், தற்போதைய குமாரபாளையம் தொகுதி சட்டப் பேரவை உறுப்பினருமான பி.தங்கமணி பங்கேற்று, பொது முடக்கக் காலத்தில் அயராமல் பணியாற்றிய 12 பெண் பணியாளா்களுக்கு தலா ரூ.7 ஆயிரத்தை தனது சொந்தப் பணத்தில் இருந்து வழங்கினாா். இந்நிகழ்ச்சியில், முன்னாள் நகராட்சித் தலைவா் வெள்ளியங்கிரி, மாவட்ட ஊராட்சிக் குழு உறுப்பினா் செந்தில், வடக்கு ஒன்றிய அதிமுக செயலாளா் சந்திரசேகரன், முன்னாள் வாா்டு உறுப்பினா்கள் ஜெய்கணேஷ், மாதேஸ்வரன், வாசுதேவன், நகராட்சி அதிகாரிகள் சரவணன், நல்லசாமி உள்ளிட்டோா் கலந்து கொண்டனா்.