நாமக்கல் மாவட்டத்தில் 9 லட்சம் பேருக்கு கரோனா தடுப்பூசி: ஆட்சியா் தகவல்

நாமக்கல் மாவட்டத்தில் இதுவரை 9 லட்சம் பேருக்கு கரோனா தடுப்பூசி செலுத்தப்பட்டுள்ளதாக ஆட்சியா் ஸ்ரேயா பி.சிங் தெரிவித்தாா்.

கரோனா தொற்று தடுப்பு நடவடிக்கையாக ஞாயிற்றுக்கிழமை மாபெரும் தடுப்பூசி முகாம் நடைபெறுகிறது. இதனையொட்டி, மாவட்டத்தில் உள்ள 15 ஊராட்சி ஒன்றியக் குழு தலைவா்களுடன் ஆலோசனைக் கூட்டம் மாவட்ட ஆட்சியா் ஸ்ரேயா பி.சிங் தலைமையில் நடைபெற்றது.

இக்கூட்டத்தில் அடிப்படை வசதி மேம்பாடு, சாலை வசதிகள், மழை நீா் சேமிப்பு கட்டமைப்புகளை உருவாக்குதல், கழிவுநீா் கால்வாயை ஏற்படுத்துதல், குடிநீா் தேவைகள், குடிநீா் இணைப்புகள் வழங்குதல், மகாத்மா காந்தி தேசிய ஊரக வேலை உறுதியளிப்புத் திட்ட பணிகள் உள்ளிட்ட வளா்ச்சித் திட்ட பணிகள் குறித்து கலந்துரையாடப்பட்டது.

மேலும், கரோனா சிறப்பு தடுப்பூசி முகாமில் அனைத்து பொதுமக்களும் தடுப்பூசி போட்டுக்கொள்ளும் வகையில் தேவையான பணிகளை தன்னாா்வத்தோடு மேற்கொள்ள வேண்டும். மேலும், ஊராட்சிப் பகுதிகளில் தன்னாா்வலா்கள் மூலம் வீடு, வீடாகச் சென்று தடுப்பூசி குறித்து எடுத்துரைக்க வேண்டும். பொதுமக்களிடம் தடுப்பூசி போட்டுக் கொள்ள விழிப்புணா்வு ஏற்படுத்த வேண்டும். அவரவா் ஊராட்சி ஒன்றியத்திற்குள்பட்ட ஊராட்சி மன்றத் தலைவா்கள், அலுவலா்கள் மற்றும் பணியாளா்களையும் தடுப்பூசி முகாம் பணிகளில் முழுமையாக ஈடுபடுத்த வேண்டும் என்றாா்.

இதனையடுத்து செய்தியாளா்களிடம் ஆட்சியா் கூறியதாவது:

நாமக்கல் மாவட்டத்தில் 18 வயதுக்கு மேற்பட்டோா் 18 லட்சம் போ் உள்ளனா். இதில், முதல் தவணையாக கரோனா தடுப்பூசி 7 லட்சத்து 16 ஆயிரத்து 263 பேருக்கும், இரண்டாம் தவணையாக 1 லட்சத்து 85 ஆயிரத்து 543 பேருக்கும் என சுமாா் 9 லட்சம் பேருக்கு தடுப்பூசி செலுத்தப்பட்டுள்ளது. முதல் தவணை தடுப்பூசியை இன்னும் 50 சதவீதம் போ் செலுத்திக் கொள்ள வேண்டியது உள்ளது.

இரண்டு தவணை தடுப்பூசி செலுத்திக் கொண்டவா்களுக்கு 97 சதவீதம் உயிரிழப்பு ஏற்பட வாய்ப்பில்லை. பொதுமக்கள் அனைவரும் கரோனா தடுப்பூசியை செலுத்திக் கொள்வது அவசியம். யாரும் அச்சப்பட தேவையில்லை. சிறப்பு முகாம்களில் 1 லட்சம் பேருக்கு தடுப்பூசி செலுத்த இலக்கு நிா்ணயிக்கப்பட்டுள்ளது. 67 ஆயிரம் டோஸ் இருப்பில் உள்ளது. மேலும் தேவையான ஒதுக்கீடு மாவட்டத்துக்கு விரைவில் வர இருக்கிறது என்றாா்.

இக்கூட்டத்தில் மாவட்ட ஊரக வளா்ச்சி முகமை திட்ட இயக்குநா் சு.வடிவேல், ஊராட்சி ஒன்றிய குழுத்தலைவா்கள் மற்றும் அரசுத் துறை அலுவலா்கள் கலந்து கொண்டனா்.