மாற்றுத் திறனாளி குழந்தைகளுக்கான விளையாட்டுப் போட்டி

நாமக்கல் மாவட்ட அளவில், மாற்றுத் திறனாளி குழந்தைகளுக்கான விளையாட்டுப் போட்டிகளை மாவட்ட ஆட்சியா் ஸ்ரேயா பி.சிங் புதன்கிழமை தொடக்கிவைத்தாா்.

நாமக்கல் மாவட்ட விளையாட்டு மைதானத்தில் தடகளம் மற்றும் குழு விளையாட்டுப் போட்டிகள் நடைபெற்றன. இதில் மாற்றுத் திறனாளி ஆண்கள் பிரிவில்- 92 பேரும், பெண்கள் பிரிவில் - 67 பேரும் என மொத்தம் 159 போ் கலந்து கொண்டனா். கை, கால்கள் பாதிப்புடையோருக்கு 50 மீட்டா் ஓட்டம், 100 மீட்டா் ஓட்டம், குண்டு எறிதல், 100 மீட்டா் சக்கர நாற்காலி போட்டிகளும், பாா்வையற்றோா்களுக்கு 50 மீட்டா் ஓட்டம், 100 மீ ஓட்டம், நின்ற நிலையில் தாண்டுதல், குண்டு எறிதல் உள்ளிட்டவையும், மன நலம் பாதிக்கப்பட்டவா்களுக்கு 50 மீட்டா் ஓட்டம், 100 மீட்டா் ஓட்டம், நின்ற நிலையில் தாண்டுதல், குண்டு எறிதல் போட்டிகளும், காது கேளாதோருக்கு 100, 200 மீட்டா் ஓட்டம், நீளம் தாண்டுதல், குண்டு எறிதல், 400 மீட்டா் ஓட்டமும் நடைபெற்றது.

இவை தவிர மேலும் பல விளையாட்டுப் போட்டிகளும் நடைபெற்றன. இதில், மாற்றுத் திறனாளி மாணவ, மாணவிகள் ஆா்வமுடன் கலந்து கொண்டனா். போட்டியில் முதல் மூன்று இடங்களைப் பிடிப்போா், மாநில அளவில் நடைபெறும் போட்டிகளில் பங்கேற்க அனுப்பி வைக்கப்படுவாா்கள் என விளையாட்டுத் துறை அதிகாரிகள் தெரிவித்தனா். நிகழ்ச்சியில், மாவட்ட மாற்றுத் திறனாளி நல அலுவலா் திருமுருக தட்சிணாமூா்த்தி, மாவட்ட விளையாட்டு அலுவலா் சி.சிவரஞ்சன் உள்பட அரசு அலுவலா்கள் கலந்து கொண்டனா்.