பேரறிவாளன் விடுதலை: நாமக்கல்லில் காங்கிரஸாா் மெளன ஆா்ப்பாட்டம்

பேரறிவாளன் விடுதலைக்கு எதிராக, நாமக்கல்லில் காங்கிரஸ் கட்சியினா் வியாழக்கிழமை மெளன ஆா்ப்பாட்டத்தில் ஈடுபட்டனா்.

முன்னாள் பிரதமா் ராஜீவ் காந்தி கொலை வழக்கில் கைதாகி சிறையில் இருந்த பேரறிவாளன் புதன்கிழமை உச்சநீதிமன்றத் தீா்ப்பால் விடுதலை செய்யப்பட்டாா். இந்த நிலையில், வன்முறை எதிா்ப்பு, கருத்து மாறுபாடுகளுக்கு தீா்வு கொலையல்ல என்பதை வலியுறுத்தி, மாநிலம் முழுவதும் காங்கிரஸ் கட்சி சாா்பில் வியாழக்கிழமை மெளன வழியில் ஆா்ப்பாட்டம் நடைபெறும் என தமிழ்நாடு காங்கிரஸ் தலைவா் கே.எஸ்.அழகிரி தெரிவித்திருந்தாா்.

அதன்படி, நாமக்கல் கிழக்கு மாவட்ட காங்கிரஸ் சாா்பில், நாமக்கல் பூங்கா சாலையில் மாவட்டத் தலைவா் பி.ஏ.சித்திக் தலைமையில் வாயில் வெள்ளைத் துணியைக் கட்டியபடி அக்கட்சியினா் மெளன ஆா்ப்பாட்டம் நடத்தினா். இதில், முன்னாள் மாவட்டத் தலைவா் பி.எஸ்.டி.செல்வராஜ், வட்டாரத் தலைவா்கள் தங்கராஜ், ஜெகந்நாதன், குப்புசாமி, சொக்கலிங்கம், மூா்த்தி, ரங்கசாமி, பேரூா் தலைவா்கள் சிங்காரம், சீனிவாசன், பூபதி, இளங்கோ, சண்முகசுந்தரம், செல்வசேகரன், முரளி மற்றும் மகளிா் அணி நிா்வாகிகள், ஒன்றிய, நகர, நிா்வாகிகள் பலா் கலந்து கொண்டனா்.