புயல், மழையால் சாய்ந்த வாழை மரங்கள்: ஆட்சியா் ச.உமா ஆய்வு

எருமப்பட்டி, சேந்தமங்கலம் பகுதியில் ஃபென்ஜால் புயல், கனமழையால் சாய்ந்த வாழை மரங்கள், இதர பயிா்களை ஆட்சியா் ச.உமா நேரில் ஆய்வு செய்தாா்.

நாமக்கல் மாவட்டம், சேந்தமங்கலம், எருமப்பட்டி ஒன்றியங்களில் பெய்த கனமழையால் விவசாய நிலங்கள் பாதிப்படைந்தன. குறிப்பாக, வாழை மரங்கள் அதிக அளவில் சாய்ந்து விழுந்தன. பயிா்ச் சேதங்களை மாவட்ட ஆட்சியா் நேரில் பாா்வையிட்டு ஆய்வு மேற்கொண்டதுடன், விவசாயிகளுடன் கலந்துரையாடினாா்.

சேந்தமங்கலம் ஒன்றியம், பெரியகுளம் ஊராட்சி, பட்டத்தயான்குட்டை கிராமத்தில், நான்கு விவசாயிகளின் 10 ஏக்கா் நெற்பயிா், ஏழு விவசாயிகளின் 12 ஏக்கா் பருத்தி, 3.5 ஏக்கரில் இரு விவசாயிகளின் கரும்பு பயிா் என மொத்தம் 13 விவசாயிகளின் 25.5 ஏக்கரில் பயிா் சாகுபடி மேற்கொள்ளப்பட்டுள்ளதை ஆட்சியா் பாா்வையிட்டாா்.

மழையினால் ஏற்பட்டுள்ள பாதிப்புகள் குறித்து விவசாயிகளிடமும், துறை அலுவலா்களிடத்திலும் அவா் கேட்டறிந்தாா். பெரியகுளம் தடுப்பணை, பழையபாளையம் ஏரியில் கனமழை காரணமாக நீா்வரத்து அதிகரித்துள்ளதையும், கரையோர மற்றும் தாழ்வான பகுதிகளில் மேற்கொள்ளப்பட்டுள்ள பாதுகாப்பு நடவடிக்கைகள் குறித்தும் ஆய்வு மேற்கொண்டாா்.

குறிப்பாக, நீா்ப்பிடிப்பு பகுதிகளின் மழை அளவு, தற்போதைய நீா்வரத்து உள்ளிட்ட விவரங்களை நீா்வள ஆதாரத் துறையினரிடம் கேட்டறிந்தாா். பொதுமக்களுக்கு விழிப்புணா்வு ஏற்படுத்திடவும், ஆடு, மாடு உள்ளிட்ட கால்நடைகளைப் பாதுகாத்திட தேவையான நடவடிக்கைகளை மேற்கொள்ளவும் வருவாய்த் துறை, ஊராட்சித் துறை அலுவலா்களுக்கு அறிவுறுத்தினாா். இதனையடுத்து, எருமப்பட்டி ஊராட்சி ஒன்றியம், பவித்திரம்புதூா் ஊராட்சி, தோட்டமுடையான்பட்டி கிராமத்தில் 10 விவசாயிகள் 12.86 ஏக்கரில் பயிரிட்டிருந்த வாழைகள் மழையால் சேதமடைந்துள்ளதை ஆட்சியா் பாா்வையிட்டாா்.

இந்த ஆய்வின்போது, வேளாண்மை இணை இயக்குநா் பெ.கலைச்செல்வி, துணை இயக்குநா் ப.கவிதா, தோட்டக்கலை துணை இயக்குநா் மா.புவனேஸ்வரி உள்பட துறை சாா்ந்த அலுவலா்கள் உடனிருந்தனா்.