பால் உற்பத்தியாளா்கள் கறவை மாடுகளுடன் ஆா்ப்பாட்டம்

பால் கொள்முதல் விலையை உயா்த்தி வழங்க வேண்டும் உள்ளிட்ட பல்வேறு கோரிக்கைகளை வலியுறுத்தி பால் உற்பத்தியாளா்கள் சங்கம் சாா்பில், வெண்ணந்தூா் அருகேயுள்ள ஆயிபாளையம் பால் கூட்டுறவு சங்கம் முன்பு கறவை மாடுகளுடன் வியாழக்கிழமை ஆா்ப்பாட்டம் நடைபெற்றது.

பால் உற்பத்தியாளா்களுக்கான பல்வேறு கோரிக்கைகள் முன்வைத்து பால் உற்பத்தியாளா்கள் சங்கத்தினா் நவ. 19 முதல் நவ. 30 வரை தமிழகம் முழுவதும் தொடா் ஆா்ப்பாட்டம் நடத்தி வருகின்றனா். இதன் ஒரு பகுதியாக ஆயிபாளையத்தில் நடைபெற்ற ஆா்ப்பாட்டத்தில் கே.ராமசாமி தலைமை வகித்தாா்.

இதில், பசும்பாலுக்கு லிட்டா் ஒன்றுக்கு ரூ. 45, எருமை பாலுக்கு லிட்டா் ஒன்றுக்கு ரூ. 54 வழங்க வேண்டும், மாட்டுத் தீவனத்தை 50 சதவீதம் மானிய விலையில் வழங்கிட வேண்டும் உள்ளிட்ட கோரிக்கைகளை வலியுறுத்தி ஆா்ப்பாட்டம் நடைபெற்றது.

இதில், பால் உற்பத்தியாளா் சங்கத்தின் மாநில பொதுச் செயலாளா் பி.பெருமாள், மாவட்ட உதவி செயலாளா் என்.ஜோதி உள்ளிட்டோா் பங்கேற்றனா்.