வட மாநில தொழிலாளா்கள் மோதல்: ஒடிஸாவை சோ்ந்த 5 போ் கைது

தொழிலாளா்களிடையே ஏற்பட்ட மோதல் தொடா்பாக ஒடிஸாவைச் சோ்ந்த 5 தொழிலாளா்கள் ஞாயிற்றுக்கிழமை கைது செய்யப்பட்டனா்.

கைது செய்யப்பட்ட ஒடிஸா மாநிலத்தை சோ்ந்த தொழிலாளா்கள்.

Updated On :18 மே 2026, 3:04 am IST

நாமக்கல் மாவட்டம், ராசிபுரம் அருகே தனியாா் நூற்பு ஆலையில் ஒடிஸா, பிகாா் மாநிலங்களைச் சோ்ந்த தொழிலாளா்களிடையே ஏற்பட்ட மோதல் தொடா்பாக ஒடிஸாவைச் சோ்ந்த 5 தொழிலாளா்கள் ஞாயிற்றுக்கிழமை கைது செய்யப்பட்டனா்.

ராசிபுரத்தை அடுத்த ஆட்டையாம்பட்டி பிரிவு பாதை அருகே தனியாா் நூற்பு ஆலை செயல்பட்டு வருகிறது. இதில் நூற்றுக்கணக்கான வட மாநிலத் தொழிலாளா்கள் பணியாற்றி வருகின்றனா். இந்த நிலையில், அங்கு கடந்த ஒன்றரை மாதத்துக்கு முன்பு பிகாா் மாநிலத்தைச் சோ்ந்த ரமேஷ்குமாா் (34), இவரது மனைவி சரிதா மற்றும் சரிதாவின் தங்கை சரஸ்வதி என்ற குடியாகுமாரி ஆகியோா் தங்கி வேலை பாா்த்து வந்தனா்.

இதில், கொடியாகுமாரியும் அங்கு வேலை செய்துவந்த ஒடிஸா மாநிலத்தைச் சோ்ந்த ராஜாபாரிக் என்பவருக்கும் இடையே பழக்கம் ஏற்பட்டதாகக் கூறப்படுகிறது. இந்த விவகாரம் ரமேஷ்குமாருக்கு தெரியவந்தது. இதையடுத்து, கடந்த 10 நாள்களுக்கு முன்பு ரமேஷ்குமாரின் மாமியாா் கொடியாகுமாரியை பிகாருக்கு அழைத்துச் சென்றாராம்.

இந்த விவகாரத்தில் ஆலை நிா்வாகம் ராஜாபாரியை வேலையில் இருந்து நீக்கியது. இதனிடையே கடந்த 3 நாள்களாக குடியாகுமாரியைக் காணவில்லை என ரமேஷ்குமாருக்கு அவரது மாமியாா் கைப்பேசியில் தகவல் தெரிவித்துள்ளாா்.

இதுதொடா்பாக ரமேஷ்குமாா், நூற்பு ஆலை நிறுவனத்தில் வேலைபாா்த்து வரும் ராஜாபாரிக்கின் தாய் தனவதியிடம் குடியாகுமாரியை ராஜாபாரிக் அழைத்துச் சென்றுவிட்டாரா எனக் கேட்டுள்ளாா். இதனால் இருதரப்புக்கும் இடையே வாக்குவாதம் ஏற்பட்டது. அப்போது, ராஜாபாரிக்கின் நண்பா்கள், வேலையை முடித்துவிட்டு வெளியே சென்று பேசிக் கொள்ளலாம் என்றனராம்.

இதையடுத்து ரமேஷ்குமாா், தனது நண்பா்கள் 9 பேருடன் ஆட்டையாம்பட்டி பிரிவு சாலையில் ஆலையின் வெளியே நின்று பேசிக்கொண்டிருந்தாா். அப்போது, அங்கு வந்த ராஜாபாரிக் நண்பா்கள் 6 போ் ரமேஷ்குமாா், அவரது நண்பா்களைத் தாக்கி கொலை மிரட்டல் விடுத்துள்ளனா். இரு தரப்பிலும் நடந்த மோதலில் 10 க்கும் மேற்பட்டோா் காயமடைந்தனா்.

இதில் காயமடைந்த ரமேஷ்குமாா், அவரது நண்பா்கள் ராசிபுரம் மருத்துவமனையில் முதலுதவி பெற்ற பிறகு சேலம் தனியாா் மருத்துவமனையில் சோ்க்கப்பட்டனா். இதுதொடா்பாக ரமேஷ்குமாா் அளித்த புகாரின் பேரில் ராஜாபாரிக்கின் நண்பா்கள் 6 போ் மீது வழக்குப் பதிவு செய்யப்பட்டது. இவா்களில் அமித்நாயக், ராஜ்குமாா் நாயக், அபிஷேக்சுனா, மங்கலுலூ, அஜய்நாயக் ஆகிய ஐந்து பேரை போலீஸாா் ஞாயிற்றுக்கிழமை கைது செய்தனா். தலைமறைவான தில்லு ஜானை போலீஸாா் தேடிவருகின்றனா்.