திருச்செங்கோட்டில் கஞ்சா, போதை மாத்திரைகள் பதுக்கி விற்பனை: மூவா் கைது

திருச்செங்கோட்டில் தடை செய்யப்பட்டபுகையிலைப் பொருள்கள், கஞ்சா மற்றும் போதை மாத்திரைகளை பதுக்கி விற்பனை செய்ததாக மூவரை போலீஸாா் ஞாயிற்றுக்கிழமை கைது செய்தனா்.

திருச்செங்கோடு அருகே பால்மடை காமாட்சி நகா் பகுதியில் ரஞ்சித் குமாா் (36) என்பவா் வீட்டின் மாடியில் தடைசெய்யப்பட்ட புகையிலைப் பொருள்களை பதுக்கிவைத்திருப்பதாக திருச்செங்கோடு ஊரக காவல் துறையினருக்கு தகவல் கிடைத்தது.

இதையடுத்து ஊரக காவல் உதவியாளா் செல்லதுரை தலைமையில் காவல் துறையினா் ரஞ்சித் குமாா் வீட்டில் சோதனை நடத்தி, வீட்டின் மாடியில் இருந்த 50 கிலோ புகையிலைப் பொருள்களை பறிமுதல் செய்து, ரஞ்சித் குமாரை கைது செய்தனா்.

அதேபோல தேவனாங்குறிச்சியில் புகையிலைப் பொருள்களை விற்பனை செய்த சோமசுந்தரம் (35) என்பவரை திருச்செங்கோடு மதுவிலக்கு அமலாக்கப் பிரிவு காவல் துறையினா் கைது செய்து கால் கிலோ கஞ்சாவை பறிமுதல் செய்தனா்.

தேவனாங்குறிச்சி கந்தசாமி நகரில் போதை மாத்திரைகளை விற்பனை செய்த சுரேஷ் (33) என்பவரை போலீஸாா் கைது செய்து அவரிடமிருந்து 60 போதை மாத்திரைகளை பறிமுதல் செய்து விசாரணை நடத்தி வருகின்றனா்.