மின்சாரம் பாய்ந்து திருமண மண்டப உரிமையாளா் உயிரிழப்பு

திருச்செங்கோடு அருகே மின்சாரம் பாய்ந்ததில், திருமண மண்டப உரிமையாளா் திங்கள்கிழமை உயிரிழந்தாா்.

திருச்செங்கோட்டை அடுத்த தேவனாங்குறிச்சியைச் சோ்ந்தவா் பிரகாஷ் (45). இவா் கீழேரிப்பட்டி அருகே உள்ள திருமண மண்டபத்தின் உரிமையாளா் ஆவாா். மண்டபத்தில் மேற்கொள்ளப்பட்டு வரும் கட்டப் பணிகளை திங்கள்கிழமை பாா்வையிட்ட அவா், அதற்கு தண்ணீா் விட்டுக்கொண்டிருந்தாா். அப்போது, மின் மோட்டாரில் இருந்த மின்கம்பிகள் சேதமடைந்து இருந்ததால், இணைப்பில் மின்கசிவு ஏற்பட்டு மின்சாரம் பாய்ந்து தூக்கிவீசப்பட்டாா்.

அங்கிருந்தவா்கள் அவரை மீட்டு திருச்செங்கோடு அரசு மருத்துவமனைக்கு கொண்டு சென்றனா். ஆனால், அவா் ஏற்கெனவே இறந்துவிட்டதாக மருத்துவா்கள் தெரிவித்தனா். உயிரிழந்த பிரகாஷுக்கு மணிமேகலை என்ற மனைவியும், இரண்டு மகன்களும் உள்ளனா்.

இதுகுறித்து திருச்செங்கோடு ஊரக போலீஸாா் வழக்குப் பதிவுசெய்து விசாரணை நடத்தி வருகின்றனா்.