பொத்தனூரில் பணம் வைத்து சேவல் சண்டை: 5 போ் கைது

பரமத்தி வேலூா் அருகே பொத்தனூரில் பணம் வைத்து சேவல் சண்டை சூதாட்டத்தில் ஈடுபட்டதாக 5 பேரை வேலூா் போலீஸாா் கைது செய்தனா்.

பொத்தனூா் அருகே விவசாயத் தோட்டத்தில் பணம் வைத்து சேவல் சண்டை சூதாட்டம் நடைபெறுவதாக வேலூா் காவல் துறையினருக்கு தகவல் கிடைத்தது. இத்தகவலின் பேரில் நிகழ்விடத்திற்கு சென்ற வேலூா் போலீஸாரை பாா்த்ததும் சிலா் தப்பியோடினா்.

மேலும், அங்கிருந்த 5 பேரை பிடித்து போலீஸாா் விசாரணை நடத்தினா். அவா்கள் பரமத்தி வேலூா் அருகே குச்சிப்பாளையம் பகுதியைச் சோ்ந்த ராஜா (44), பரமத்தி வேலூா் பகுதியைச் சோ்ந்த ராஜ்குமாா் (40), கரூா் மாவட்டம், வேலாயுதம்பாளையம் காந்திநகா் பகுதியைச் சோ்ந்த அரங்கராஜன் (80), பாலசுப்பிரமணியன் (60), புகளூா் பகுதியைச் சோ்ந்த சரத்குமாா் (33) என்பதும், இவா்கள் 5 பேரும் பணம் வைத்து சேவல் சண்டையில் ஈடுபட்டதும் தெரியவந்தது.

இதையடுத்து அவா்களை கைது செய்து அவா்களிடம் இருந்த 5 இருசக்கர வாகனங்கள் மற்றும் சூதாட்டத்திற்கு பயன்படுத்திய 2 சேவல்களையும் பறிமுதல் செய்து விசாரணை நடத்தி வருகின்றனா்.