வெளிநாட்டில் வேலை வாங்கித் தருவதாக ரூ. 30 லட்சம் மோசடி: நடவடிக்கை கோரி தம்பதி தா்னா

வெளிநாட்டில் வேலை வாங்கித் தருவதாகக் கூறி ரூ. 30 லட்சம் மோசடி செய்தவரை கைது செய்து, பணத்தை மீட்டுத் தர வலியுறுத்தி, அவரது வீட்டின் முன் தா்னாவில் ஈடுபட்ட தம்பதியிடம் போலீஸாா் செவ்வாய்க்கிழமை விசாரணை நடத்தினா்.

நாமக்கல் மாநகராட்சி, மருதமுத்து தெருவைச் சோ்ந்தவா் தஷ்தகீா் (35). திமுக கட்சியைச் சோ்ந்த இவா் வெளிநாடுகளில் வேலை வாங்கித் தருவதாகக் கூறி பலரிடம் பணம் பெற்று மோசடியில் ஈடுபட்டு வந்ததாகக் கூறப்படுகிறது.

ஈரோடு மாவட்டம், பவானி அருகே குதிரைக்கால்மேடு பகுதியைச் சோ்ந்தவா் பெனிட்டோ ஜாா்ஜ் (33). பட்டதாரியான இவருக்கு, அதே பகுதியைச் சோ்ந்த கேசவன் என்பவருடன் பழக்கம் ஏற்பட்டது. ஏற்கெனவே சிங்கப்பூரில் பணியாற்றிவிட்டு சொந்த ஊா் திரும்பியிருந்த பெனிட்டோ ஜாா்ஜிடம், நாமக்கல்லைச் சோ்ந்த தனது நண்பா் தஷ்தகீா் வெளிநாடுகளில் வேலை வாங்கித் தருவதாகவும், அவரைத் தொடா்புகொண்டால் வேலைவாய்ப்பு கிடைக்கலாம் என்றும் கேசவன் தெரிவித்துள்ளாா்.

இதையடுத்து, தஷ்தகீரைத் தொடா்புகொண்டு பேசிய பெனிட்டோ ஜாா்ஜ், தனது நண்பா்கள் மற்றும் உறவினா்கள் 15 பேருக்கு வெளிநாட்டு வேலை வாங்கித் தருவதற்காக, தலா ரூ. 2 லட்சம் வீதம் மொத்தம் ரூ. 30 லட்சத்தை தனது வங்கிக் கணக்கிலிருந்து சில மாதங்களுக்கு முன்பு தஷ்தகீருக்கு அனுப்பியுள்ளாா்.

ஆனால், அவா் வேலை வாங்கித் தராமலும், பெற்ற பணத்தைத் திருப்பிக் கொடுக்காமலும் இருந்ததாகக் கூறப்படுகிறது. மேலும், நாமக்கல்லில் உள்ள அவரது வீடும் பூட்டப்பட்டிருந்தது. இதையடுத்து, செவ்வாய்க்கிழமை நாமக்கல் வந்த பெனிட்டோ ஜாா்ஜ், தனது மனைவி அம்பிகாவுடன் தஷ்தகீரின் வீட்டின் முன் தா்னாவில் ஈடுபட்டாா்.

தகவலறிந்து வந்த போலீஸாா் இருவரிடமும் விசாரணை நடத்தினா். மேலும், தஷ்தகீரைப் பிடித்து விசாரிக்க நடவடிக்கை மேற்கொண்டனா்.