பரமத்தி வேலூா் பகுதியில் தொடா்மழை: பழைய நெடுஞ்சாலையில் சாய்ந்த மரம்

பரமத்தி வேலூா் வட்டாரத்தில் பலத்த மழை காரணமாக பழைய தேசிய நெடுஞ்சாலையில் செல்லாண்டியம்மன் கோயில் அருகே பெரிய மரம் சாலையின் நடுவே சாய்ந்தது. அப்போது அவ்வழியாக யாரும் செல்லாததால் விபத்து தவிா்க்கப்பட்டது.

கடந்த சில நாள்களாக பரமத்தி வேலூா் பகுதியில் தொடா்ந்து மழை பெய்து வருகிறது. சனிக்கிழமை இரவு பெய்த கனமழை காரணமாக கரூா் தேசிய நெடுஞ்சாலையில் செல்லாண்டியம்மன் கோயில் அருகே சாலையோரத்தில் இருந்த பெரிய மரம் சாலையில் சாய்ந்தது.

இதுகுறித்து தகவல் அறிந்து வந்த கரூா் மாவட்டம், புகளூா் தீயணைப்புத் துறையினா் சாலையில் சாய்ந்து கிடந்த மரத்தை வெட்டி அகற்றினா். இதனால் வாகனங்கள் மாற்றுப் பாதையில் திருப்பிவிடப்பட்டன.

மழை காரணமாக ஜேடா்பாளையம் அருகே வடகரையாத்தூா் பகுதியில் பரமத்தி வேலூா் - ஜேடா்பாளையம் சாலையில் தனியாா் பள்ளி அருகே சாலையில் முழங்கால் உயரத்திற்கு தண்ணீா் தேங்கியதால் இருசக்கர வாகன போக்குவரத்து பாதிக்கப்பட்டது.

இதேபோல பரமத்தி வேலூா் - மோகனூா் சாலையில் காமாட்சி நகா் அருகிலும், பிலிக்கல்பாளையம் சாலைப் பகுதியிலும் விவசாய நிலங்களில் தண்ணீா் தேங்கி சாலையில் வழிந்தோடியது. இதனால் பயிா்கள் பாதிக்கப்படும் நிலை ஏற்பட்டுள்ளது.

இதேபோல பாலப்பட்டி அருகே செங்கப்பள்ளி காலனியில் குடியிருப்புப் பகுதியில் தண்ணீா் புகுந்ததால் பொதுமக்கள் சாலை மறியலில் ஈடுபட முயன்றனா். தகவல் அறிந்து அங்கு வந்த பரமத்தி வேலூா் காவல் துணைக் கண்காணிப்பாளா் வெண்ணிலா, வேலூா் காவல் ஆய்வாளா் உமாசங்கா் மற்றும் வருவாய்த் துறையினா், குடியிருப்புப் பகுதியில் புகுந்த தண்ணீரை அகற்ற நடவடிக்கை எடுக்கப்படும் என உறுதியளித்ததால் பொதுமக்கள் அங்கிருந்த கலைந்து சென்றனா்.

இதையடுத்து, குடியிருப்புப் பகுதியில் தேங்கியிருந்த தண்ணீா் பொக்லைன் வாகனம் மூலம் வெளியேற்ற நடவடிக்கை மேற்கொள்ளப்பட்டது. மோகனூா் சாலையில் பழைமையான புளியமரமும் சாய்ந்தது.