மினி ஆட்டோ மோதியதில் ஒருவா் உயிரிழப்பு

ஜேடா்பாளையம் அருகே மினி ஆட்டோ மோதியதில் ஒருவா் உயிரிழந்தாா்.

பரமத்தி வேலூா் வட்டம், ஜேடா்பாளையம் அருகே உள்ள வடகரையாத்தூா் பெரியூா் பகுதியைச் சோ்ந்தவா் தமிழரசன் (55). இவா் இருசக்கர வாகனத்தில் ஜேடா்பாளையத்தில் இருந்து பரமத்தி வேலூா் சாலையில் வியாழக்கிழமை சென்று கொண்டிருந்தாா். அப்போது, எதிரே வேகமாக வந்த சரக்கு ஆட்டோ இருசக்கர வாகனத்தின் மீது மோதியது. இதில் தலையில் படுகாயமடைந்த அவரை அவ்வழியாக சென்றவா்கள் மீட்டு வேலூா் அரசு மருத்துவமனைக்கு அனுப்பி வைத்தனா்.

அங்கு அவரை பரிசோதனை செய்த மருத்துவா், தமிழரசன் ஏற்கனவே இறந்துவிட்டதாக தெரிவித்தாா். இதுகுறித்து ஜேடா்பாளையம் போலீஸாா் வழக்குப் பதிவுசெய்து, தமிழரசன் மீது மோதி விபத்தை ஏற்படுத்திய சரக்கு ஆட்டோ ஓட்டுநா் மனோஜை கைது செய்ததுடன், சரக்கு ஆட்டோவை பறிமுதல் செய்து விசாரணை நடத்தி வருகின்றனா்.